Genese 13 - Pupu Oharo Āre 1963 Genese 1970 Rute 1972

Aberamo i Lota ila oki lahua lahua auvahaeaki

¹ Aberamo Aigupito hakurepape, are i uva i eharu oaria ila hareho. Lota kara are i hareho diho hoa hoaupe.

² Aberamo va avai haela le leipe, boromakau oaria, kai silver i gold ila.

³ Kahara, are diho hoa hakurepai Betela leia hahi leipe, aiai are overa elare kovo ita avape la ita, Betela i Ai ve aru hihi,

⁴ aiai are overa arura haha ukape; leia Aberamo Iehova ve rare itavape.

⁵ Lota Aberamo ila hoaupe; are mamoe oaria i boromakau i kovo uvi oaria ila.

⁶ Laelave, erealila la ita hoa haroapo apeakive hovea au laila, ehovea erealila ve eharu maeakoko leivahaeape; erealila hareho apeakive hovea au laila.

⁷ Aberamo ve boromakau kiva haela i Lota ve boromakau kiva haela ila hahari avahaeape. La hoa Kanana haela i Perisi haela ila la ita apearoape.

⁸ Kahara, Aberamo Lota maeape: “Elavaila hahari leivahaea v'arekaea; elavaila ve boromakau kiva haela kara hahari kalaivahaelue, ehovea elavaila va apavara.

⁹ Ita eapapo ave oropa ve aea va ka ha? Elavaila oki lahua lahua aukive, heroe. A va mai keva ukai hoauki, ara va mai ore ukai hoaukilai; aka a va mai ore ukai hoauki, ara va mai keva ukai hoaukilai.”

¹⁰ Lota ovohae iupepe; are ovohae eavape, Ioridana ita heheapa mekakure, ma hoho oaria ila, Iehova Aualari ve oru ita hovea hovea, Aigupito ita hovea, Soara ve ukai ve; ma va oropa hoa, Iehova Sodoma i Gomora ila aireaki hai ka leipe.

¹¹ Laelave, Lota Ioridana ukai ve la ita heheapa ikivere lei avape, Lota kauri ukaki ve hahi leipe, laelave erealila oki lahua lahua loape.

¹² Aberamo Kanana ita aeaveape; Lota la ita heheapa la karikara ukai ve hoaupe. Are areve kovo ita Sodoma leia avape.

¹³ Sodoma haela va mai heahaha oaria haela. Ere Aualari oropa ve mai hahaeae oaria leivahaeape.

¹⁴ Iehova Aualari Aberamo maeape, Lota arero overa hakurepape la hoa, “Ave ovohae iupeki, ovohae mekari eavaki, paipai hoa i diho hoa ila, kauri ukai i hurava ukai ila;

¹⁵ a ovohae eavaki la ita oaria ara aro aiarakilai, ave meavohula oaria kara, aiai aireaki hoa haiapo.

¹⁶ Ara ave meavohula kekele mahuvu hovea hovea leikilai; laria, a va kekele mahuvu ve numera ore la leikilava, a va ave meavohula ve numera kara ore leikilai hovea.

¹⁷ Urou, la ita eapapo heaikiapo i huraha ila loa veaki, ehovea ara arero aro avarakilai”.

¹⁸ Laelave Aberamo kovo uvi hareavape; are iki Mamere ve havuhu kora leia aeaveape, Heberona la ita maeamaea. Leia are Iehova ve arura haha ukape.