Genese 12 - Pupu Oharo Āre 1963 Genese 1970 Rute 1972

Aualari Aberamo itavape

¹ Kahara, Iehova Aberamo maria maeape: “A elare ita, elare apavara, elare oa ve uvi, haitapai, iki ara aro kileaki la ita aukive.

² Ara aro meavohula ve ita vilaipi lei eapapo leikilai; ara aro lei morapaeakilai, kai ave rare lei eapapo leikilai, a va haela oaria lei mekaka leivahaeakilai.

³ Aro lei mekaka leiki la haela ara lei mekaka leivahaeakilai; aro o heaha maeaki la haela ara o heaha maeakilai. Ave oki ve meahaiapo ve lalava oaria lei mekaka leivahaeakilai.”

⁴ Laelave, Aberamo Iehova maeape la oharo hovea, hahi le aupe. Lota are i hareho aupe. Aberamo Harana harepape hoa are va hitolo 75 leipe.

⁵ Aberamo areve uva Sarai, kai areve akoreheari ve akore Lota, kai ere korukaivahaeape eharu oaria, kai ereve horova haela oaria, ere Harana leia korukaiavahaeape la haela oaria; ere hoahukape, ehovea Kanana la mea haropakive, kai Kanana ita le koarape,

⁶ Ere Kanana la ita koarape la hoa, Aberamo la ita ve aru hihi ve hahi lei lei Sekema leia, More la ita heheapa kihoaupe. La hoa Kanana haela ita apearoape.

⁷ Iehova Aberamo oropa ve kihoai mariape: “Ara ma ita eve meavohula avarakilai.” Laelave are leia arura haha ukape, ehovea Iehova leia areve oropa ve hihika leipe.

⁸ Are leia harepai, Betela ve kauri ukaki la kela leia pekape, are leia elare kovo uvi kupe, Betela va hurava ukai, kai Ai va kauri ukai ve, areve kovo ita va aru hihi ve; are leia Iehova ve arura haha ukape, kai Iehova ve rare itavape.

⁹ Kahara, Aberamo aeka hahi leipe, aiai diho hoa.

Aberamo Aigupito leia

¹⁰ Ita hohera leipe, laelave Aberamo Aigupito leia aeakive hoaupe, ehovea ita hohera eapapo leipe.

¹¹ Kahara, are Aigupito leia araeakive kekelape la hoa, are elare uva Sarai maeape: “Ara v'ore a va uamari hevehe iele;

¹² Aigupito haela aro eavaki hoa ere maeakilai ‘Ma va areve uva’; ere araro harilai, aka aro lai ovokake leikilai.

¹³ A va mari ari ‘Ara areve mariheari’, laria ara va veveke la koarakilai, kai ehovea ave la maea mekakure, ere va araro kara he va ka.”

¹⁴ Aberamo Aigupito hoaupe la hoa, Aigupito haela uamari ovohae eavape, are va uamari hevehe iele.

¹⁵ Kahara, Parao ve amua harokou haela arero eavape la hoa, ere arero Parao ve oropa ve morapaeape. Laelave ere la uamari Parao ve uvi lai pekape.

¹⁶ Ehovea la uamari, Parao Aberamo lei veveke leipe; are va mamoe, boromakau, asini mea, horova haela, horova marita, asini abu, kai kamela aiarape.

¹⁷ Aka Iehova Parao i areve lalava haela ila maea heahaha oaria v'ila hararuape, ehovea Sarai, Aberamo ve uva ila.

¹⁸ Laelave Parao Aberamo itavi mariape: “A va araro learia leipe ha? Ehovealeve a va araro au kimaeaila, are va ave uva?

¹⁹ Ehovealeve a va araro kimaeape are va ave mariheari, laelave ara arero arave uva hovea laeape? A iapa! Ave uva ma! Arero elavelave lai aukive.”

²⁰ Parao areve haela uku maeaeape — ere erero paparaehakive, are i areve uva i areve eharu oaria ila, hareho.