Genese 11 - Pupu Oharo Āre 1963 Genese 1970 Rute 1972

Babela ve Uvi

¹ Kahara, meahaiapo va uri haroapo, kai oharo lahua lahua oaria ka.

² Haela uku kauri ukai ve hahi leivahaeape la hoa ere Sinara ve leia ita heheapa koarai le apeape.

³ Ere elare oharo mari hukavape: “Ekeila, elaviila pikuru ila have karikikilai, kai erero a aroukilai ehovea aheke leikive.” Ere ve have va pikuru have hiki, kai koperereaki eharu va mea ve la pikuru.

⁴ Ere maeape: “Elaviila karikara erarikilai, kai kaia akea havahu pekaki uvi arari haroapo kukilai, elaviila ve rare haroapo lei eapapo leikilai, elaviila meahaiapo ita lahua lahua ve kopurapaki ave.”

⁵ Iehova kaia ve kihoaupe ehovea haela ve akoremari kupe karikara kai uvi arari ovohae eavakive.

⁶ Iehova maeape: “Eavaila, ere ve haela ve hiru haroapo, ere kai uri haroapo hiki; ma va ere horova au hiki ipopeavave, ere va aireaki horova ehoaha oaria hovea hovea leivahaeakilai, kai erero hereavaki oki karia.

⁷ Ekeila, elaviila hoahukakilai, ereve la uri au aiviarava la, laria, ere va elarelare hukavaki iapa va ka.”

⁸ Kahara, Iehova erero meahaiapo ita lahua lahua oaria ve kopurapape. Ere karikara āre ve la horova le hakurepape.

⁹ Laelave areve rare Babela rare itavape, ehova leia Iehova meahaiapo haela ve uri lahua lahua aiviaravarape, kai Iehova erero meahaipo ita lahua lahua oaria kopurapape.

Sema ve meavohula

¹⁰ Sema ve meavohula ma: Sema hitolo 100 leipe hoa Arepakasada epape, ma haa karia leipe hitolo orahokaila hovea.

¹¹ Sema Arepakasada oropa epai aireaki are hitolo 500 aeaveape, are aeka akoremari i marita ila erape.

¹² Arepakasada hitolo 35 leipe hoa are Sela epape;

¹³ Arepakasada Sela oropa epai, aireaki are hitolo 403 ovokake aeaveape; are aeka akoremari i marita ila erape.

¹⁴ Sela hitolo 30 leipe la hoa are Ebera epape;

¹⁵ Sela oropa Ebera epape, aireaki are ovokake aeaveape hitolo 403. Are aeka akoremari i marita ila erape.

¹⁶ Ebera hitolo 34 lei pelega epape;

¹⁷ Ebera Pelega oropa epape, aireaki are ovokake aeaveape hitolo 430; are kai akoremari i marita ila aeka erape.

¹⁸ Pelega hitolo 30 lei Reu epape;

¹⁹ Pelega Reu oropa epape, aireaki are hitolo 209 ovokake aeaveape, kai aeka akoremari i marita ila erape.

²⁰ Reu hitolo 32 lei Seruga epape;

²¹ Reu Seruga oropa epape, aireaki are hitolo 207 ila ovokake aeaveape, kai aeka akoremari i marita ila erape.

²² Seruga hitolo 30 lei Nahora epape;

²³ Seruga Nahora oropa epape, aireaki are hitolo 200 ila ovokake aeaveape, kai aeka akoremari i marita ila erape.

²⁴ Nahora hitolo 29 lei Tera epape;

²⁵ Nahora Tera oropa epape, aireaki are hitolo 119 ovokake aeaveape, kai aeka akoremari i marita ila erape.

²⁶ Tera hitolo 70 lei Aberamo, Nahora i Harana ila erape.

Tera ve meavohula ve huhuve

²⁷ Ma va Tera ve akoremari mae — Tera Aberamo, Nahora i Harana ila erape. Harana va Lota ve oa.

²⁸ Harana oropa apape, areve oa Tera aireaki apape. Harana apape ita va arero epape la ita, Ura, Kaladea haela ve ita.

²⁹ Aberamo i Nahora ila uavila karape. Aberamo ve uva ve rare va Sarai, aeva Nahora ve uva ve rare va Milika, Milika i Isika ila ve oa, Harana, ve mari la.

³⁰ Sarai korovu leipe; are akoremari au epaila.

³¹ Tera, areve akore Aberamo, kai Lota, Harana ve akore, are havahu ve meavore, kai Sarai areve akore Aberamo ve uamari, karape. Ere are i hareho Ura, Kaladea haela ve ita hakorepai Kanana ve la ita auvahaeape. Ere iki Harana leia ekepe la hoa ere au hiki apearoape.

³² Tera ve hare va hitolo 205. Tera Harana leia apape.