Galatia 3 - Pupu Oharo Āre 1963 Genese 1970 Rute 1972

Ikikekela iele Aualari ikivere, pupu hiki ka

¹ E ikihaveva Galatia haela e! Ero leita amuraeape, ehovea e va o iele iapa va ka: Iesu Keriso eve oropa ve satauro ve hihika apape.

² Ara ero eharu haroapo hiki velavela leive; E va Ove iele pupu v'ila avape ha, aka iapa ikikekela ve okiharo ve ha?

³ E va ihape leiro ha? Eve horova Ove ve ipopeavape, kai mahau aivau v'ila lei mekakure leikilai ha?

⁴ E va kakare oaria naoae naoae koarape ha? Kakare naoae iele ha?

⁵ Aeka eve leia Ove Veveke ve horova ehoaha leivila la haela, are va la aheke pupu v'ila avape ha, aka ikikekela v'ila?

⁶ O iele Abraham kara Aualari iki kekelape, laelave areve la ikikekela arero lei ehoe leipe.

⁷ E v'ore ka ha, ikikekelalula la haela va Abraham ve meavohula?

⁸ Buka oharo kara ore overa leipe, Aualari va ita lahua haela ikikekela v'ila lei ehohoe leivahaeakilai, laelave Abraham avare koare hoa ma oharo iapape, Ita lahua haela oaria a v'ila ikiveveke leivahaeakilai.

⁹ Laelave ikikelavalula haela oaria Abraham i hareho ikiveveke leivahaeakilai.

¹⁰ Ehovea pupu ve la okiharo hiki kiva leilula haela oaria heaha leivahaeakilai, ehovea overa oharo maria haeape: Pupu oaria kiva leivahaeakiaue haela oaria heaha koarakilai, buka haeape la pupu hovea hovea.

¹¹ Ma oharo va iele — haela oaria pupu ve la okiharo v'ila Aualari oropa ve lei ehohoe leivahaea va ka — ehovea, Mai ehoe haela ikikekela ve oki hiki ovokake koarakilai.

¹² Pupu oaria va ikikekela havahu ka — aeka oharo ma, Ma eharu leivila la haela are kai ereve ovokake hiki avakilai.

¹³ Keriso elaviilara pupu ve la heaha ve lei makukuripe, ehovea are havahu ela v'ila heaha leipe: ehovea buka oharo maria hape, Kora akea ve avikaki la haela va heaha iele.

¹⁴ Ehovea ita lahua haela oaria Iesu Keriso v'ila Abraham ve la veveke koarakilai. Laelave elaviila ikikekela v'ila Ove ve okoare avakilai.

¹⁵ Apavara, arave oharo haela ve oharo hiki, o iele havahu ve okoare hiki va laila, haela ae arero o iele la leikilava, ere va arero haerapa va ka, kai kopererea va ka.

¹⁶ O iele okoare Abraham i areve meamari v'ila leipe. Are maria au aila, Meavohula, oaria hovea, aka, Meamari, haroapo hovea, Ave meamari, la va Keriso iele.

¹⁷ Arave oharo ma — Aualari Keriso v'ila oropa ape la okoare, aireaki hitolo 430 karia leipe la hoa huape la pupu haerapakive hovea ka, are arero naoae lei va ka.

¹⁸ Ehovea haruku pupu ve hiki la leikilava, are va okoare iele karia, aka Aualari arero Abraham okoare hovea avarape.

Pupu ve iele

¹⁹ Laelave pupu ve iele le ha? Pupu koperereape iele ehovea mai heaha aiai okoare v'ila la meamari la epakilai: aeva aneru kara arero havila leiki haela ve oki ve avarape.

²⁰ Havila leiki haela va haela haroapo hiki ve havila lei va ka; aka Aualari va haroapo hiki.

²¹ Laelave Aualari pupu ve okoare haerapakilai ha? Arekaea! O iele pupu ae va ovokake avarakive hovea la leikilava, mai ehoe la pupu v'ila kihorera va heroe.

²² Aka buka ve la hohoa haela oaria mai heaha ve ureve hahaeape, ehovea Iesu Keriso ikikelavalula la haela va okoare iele avakilai.

²³ Aka oropa hoa, ikikekela hoa va aireaki, elaviila pupu v'ila au hahaeape, elaviila aireaki kihoreraki la ikikekela ore au leivahaeaila.

²⁴ Laelave, pupu va elaviilave kilea haela hovea, ehovea elaviilara Keriso ve leia kari aukive: elaviila ikikekela v'ila lei ehohoe leivahaeakive.

Ikikekela ve horova

²⁵ Aka ikikekela hoa la kihorerakilava, kilea haela elaviilara kari au va ka.

²⁶ Ehovea e oaria Iesu Keriso ve ikikekela v'ila Aualari ve akoremari.

²⁷ Ehovea Keriso ve bapatiso avahaeape la haela oaria va Keriso iele hoveahovea leivahaeape.

²⁸ Jew haela i ita lahua haela karia: horova haela i amua haela ila karia: vilaita i uavila ila kara karia. Elaviila oaria Keriso ve ureve haroapo hovea hovea.

²⁹ E va Keriso ve akoremari la leivahaeakilava, e va Abraham ve meavohula: e kai okoare v'ila haruku avaki haela.