Galatia 2 - Pupu Oharo Āre 1963 Genese 1970 Rute 1972Jerusalem Ekalesia areve horova ikivere leipe 1 Hitolo 14 karia leipe la hoa ara va Barnabas ila Jerusalem pekahavape. Ara Titus kara lai pekape. 2 Ove Veveke araro iki ureve la kileape, laelave ara pekape: Ara ita lahua haela ve leia ape la iroro erero kai kileape, aka la oharo muruhari kileape, ara oropa leipe la mai, kai aireaki auki la okiharo naoae leiki ave. 3 Titus, ara lai aupe la haela, are va Greek haela, aka haela arero peritome mai leikive pupu au huaila. 4 Aka, ehovea opopoe ekalesia haela uku muruhari ekevahaeape: Ere va ikivere elave Iesu Keriso v'ila la ovokake heheavakive, ehovea ere va ikivere elaro au hahakive. 5 Ela ka ereve oharo iapape ha? Ka! au iapaila! Ela va ikivere iroro oharo ve iele e v'ila aeakive. 6 Aeka, haela ve oropa haela hovea la haela, (ere va akea haela la aka akea va ka la, ara kekela va ka: haela va maea hiki Aualari kekela va ka); ere ve korukaiavahaeape la hoa, ere elaro oharo lahua au kileaila. 7 Aka ere iapape, Aualari araro ita lahua haela ve iroro arive itavape, hoveahovea are Peter Judea haela ve iroro arive itavape. 8 (Ehovea Peter Judea haela ve iroro arive aheke avarape la Aualari Are kai araro aheke avikiarape ehovea ita lahua haela ve iroro arive). 9 James, Cephas i John ila, ekalesia oropa haela la, araro avikiarape la ikiheroe meru eavape la hoa, ere ara i Barnabas ila ikiveveke lei mai papaehaupe, ehovea ela kai ita lahua haela ve horova leikive. Ere kai Judea haela ve leia. 10 Ere elaro oharo haroapo hiki velavela leipe — ela va merava haela ikikelavakive heroe: ela la mai mea oaria laria leilula. Paul Peter aihukamaeape 11 Peter Antioch ekepe la hoa ara areve oropa ve areve haeae oharo hihika maeape. 12 Ehovea uku haela James ve aireaki ekevahaeape, Peter oropa hoa ita lahua haela i hareho eapai lape, aka ere ekevahaeape la hoa are lahua aupe, ehovea are peritome ikivere haela oaoka leipe. 13 Jew haela uku kara are i hareho la hehepo mai leivahaeape, laelave ereve la hehepo Barnabas kara koarape. 14 Aka ara ovohae eavape, ere iroro veveke ve okiharo kiva mekari au leivahaeaila la hoa, ara Peter haela oaria oropa ve maeape, A va Jew haela ita lahua haela ve mai hovea la leikilava, Jew haela ve mai havahu ka; ehovealeve a va ita lahua haela Jew haela ve pupu hiki ahilavahaevila ha? Pupu hiki hovea ka 15 Elaviila Jew haela havahu kai ita lahua mai haeae haela va ka; 16 elaviila ore, haela pupu v'ila hiki lei ehoe lei va ka, aka Iesu Keriso ve la ikikekela ve okiharo ve. Elaviila Iesu Keriso iki kelavape ehovea elaviila Keriso ve la ikikekela ve lei ehohoe leivahaeakive, kai pupu v'ila va ka: ehovea pupu ve okiharo hiki haela lei ehohoe leivahaea va ka. 17 Aka elaviila Keriso v'ila lei ehohoe leivahaeakive ikivere haela, mai heaha la leivahaeakilava, Keriso va mai heaha haela ha? Arekaea! 18 Ehovea overa hakurepape la heaha ara aeka la leikilava, ara va haeae iele. 19 Ara pupu v'ila apape, laelave ara Aualari ve mai kiva leivila. 20 Ara Keriso ila hareho satauro ve apape, aka ara ovokake leive: o iele ara havahu ka, aka Keriso arave ureve ovokake leivila. Ara va ma hoa aivau ve ovokake aeavila, ehovea ara Aualari ve Akore ikikekelavila, ehovea Are araro ikivere havahu lei ara v'ila le apape. 21 Ara Aualari ve ikiheroe meru ve okiharo hereava va ka, ehovea mai ehoe pupu v'ila hiki la leikilava, Keriso naoae apape. |
Published by the British and Foreign Bible Society 1963-1972
British & Foreign Bible Society