Ephesus 6 - Pupu Oharo Āre 1963 Genese 1970 Rute 1972

¹ Akoremari, Amua ve oropa ve, eve oa i lou ila ve oharo iapaila: mai ehoe va la.

² Eve oa i lou ila momorapuki (okoare ve oropa pupu la).

³ Laria, e veveke leivahaeakilai, e kai meahaiapo haiapo apeakilai.

⁴ E oa oaria, eve akoremari hihiri ve kamuraealue; e va Amua ve mai hovea kiva leivahaeai aihukamaeaki.

⁵ Horova haela, eve meahaiapo kiva haela ve oharo iapaila, oaoka i paiala paiala ila, iki ehoe ila.

⁶ Kavale kavale mai hiki kai haela ve oropa ve hiki v'arakaea, aka Keriso ve horova haela hovea, eve horova mai Aualari ve iki ureve mai hovea hovea.

⁷ Iki veveke ila horova leivahaeaki, Amua ve oropa ve, haela hiki ka.

⁸ E v'ore haela horova veveke la leikilava, are lahovea Amua ve aeka koarakilai, au hahape haela kai amua haela hovea hovea.

⁹ E amua haela kara erero laria leivahaeaki; ikiheaha oharo kavahaelue. E v'ore, e ere i hareho ila ve la Oa kaia ve aeavila: are haela ve maea lahua lahua kekela va ka.

Keriso haela ve mare veveke eharu

¹⁰ Hita oharo ma: E va Amua v'ila aheke apeaki: areve la mai aheke leivahaeaki.

¹¹ Aualari ve basileia ve mare eharu oaria aeaki — e va diabolo ve kurupaeaki hoa aheke apeakilai.

¹² Ehovea elaviila aivau i apu ila la eharu hahari e va ka, aka ove amua, i ove heaha ve aheke ila, kai meahaiapo muru muru apealula la amua, kai kaia ve apealula la ove heaha eharu maeakoko.

¹³ Laelave, Aualari ve mare eharu oaria kaivaila, e va heaha horeraki hare kara aheke epavakilai, aeva horova oaria leivahaeai aheke apeakilai.

¹⁴ E va pavaki mai maria: Eve hopa o iele la erekai hahaki; mai ehoe ve la korepaka oraiavaki;

¹⁵ Eve loa va havila ve iroro ve la loa iilu avaki.

¹⁶ O iele, ikikekela ve la laua mai paeaki, ehovea are va mai heaha oaria ve la harita i lape ila le hereavakilai.

¹⁷ Ovokake ve haro iilu avaki, aeva Ove ve poke mai paeaki, la va Aualari ve oharo iele.

¹⁸ E va mea oaria Ove ve ivaiva i velavela mai ila kiva auhohi leivahaeaki; e va hehe haela oaria v'ila ivaiva kiva hare oaria leivahaeaki.

¹⁹ Ara v'ila kara ivaiva leivahaeaki, ehovea ara va iroro ve muruhari eharu oaria arave ape ve aheke lei horeavakilai, oaoka ka.

²⁰ Araro la horova v'ila au hahai kiparaeape — laelave ara va o aheke kileakilai, araro kileape la oharo hovea hovea.

Kokaukaki oharo

²¹ E kai arave hari ore leivahaeaki, arave leivila mai, Tychicus, apoheari veveke kai Amua ve horova haela mekakure, ero eharu oaria kileakilai.

²² Ara arero eve leia paraeaive iele ehovea la; ehovea e elave maea hovea ore leivahaeakilai, aeka are ero hakakaeakilai.

²³ Apavara oaria havila ila apeaki: E va ikikekela ve la ikiheroe ila apeaki; Oa Aualari i Amua Iesu Keriso ila la havila ila apeaki.

²⁴ Elaviilave Amua Iesu Keriso ikivere iele leilula haela oaria areve ikiheroe meru avaki.