Ephesus 5 - Pupu Oharo Āre 1963 Genese 1970 Rute 1972

¹ E va akoremari hovea Aualari ve airekai auvahaeaki haela.

² Ikiheroe mai leivahaeaki, hoveahovea Keriso elaviilara ikiheroe leivahaeape. Are kai elaviila v'ila elare maea meru hovea avarape; laelave Aualari elaviilara ikivere leivahaeape.

³ Aka mai heaha, hirihiri mai, haela ve eharu ikivere leiki mai, la eharu ve oharo kara eve leia kahukavalue; e va hehe rare avape haela.

⁴ Aeva mai haeae, ikihaveva mai, erau mai oaria, va hoveahovea ka. E va ivaiva o iele arive hiki heroe.

⁵ E va ore leivahaeaki — korea haela kai mai heaha haela, kai eharu oaria ikivere haela kai Aualari lahua lahua kelavaki haela — ere oaria Aualari i Keriso ila ve basileia ve iele aea va ka.

⁶ Haela ve pelaea oharo ero kamuraealue, ehovea ma eharu ve, Aualari iapaki aue haela hihiri leikilai.

⁷ Laelave, lahovea haela i hareho korukaiavahaea v'arekaea.

⁸ Ehovea e overa hoa muru ka apearoape — Ma hoa e va Amua ve ovava akoremari. Ovava akoremari hoveahovea apeakive, heroe.

⁹ (Ehovea Ove ve hae iele va mai veveke i mai ehoe i o iele ila).

¹⁰ Laria, e va Aualari ve ikivere eharu ore leivahaeakilai.

¹¹ E va heaha leivahaeaki la muru mai koaravahaea v'arekaea, erero aihukamaeakive heroe.

¹² Ehovea muruhari leilula la eharu, haela oharo hihika leiki hoa makiri eapapo le leikilai.

¹³ Aka, e va aihukamaeaki eharu oaria ovava ve hihika leivahaeakilai.

¹⁴ Laelave oharo mari hape: Avuku haela ovokake leiki, apape hoa ve urouki Keriso aro ovava avarakilai.

¹⁵ Kiva leila, eve mai ehoe kai kiva leivahaeaki, ikihaveva va arekaea — ikiore mai hiki leivahaeaki.

¹⁶ Hoa iele iki kelavaki, ehovea heaha hoa ma.

¹⁷ Laelave, e va ikihaveva mai kalaivahaelue; Amua ve ikivere horova leivahaeaki.

¹⁸ Ma heaha kalalavahaelue, leia va haeae iele. Ove iele avaki.

¹⁹ E va elarelare salamo kai hivi kai ove veveke ve hivi helakive; Amua ve morapaeaki hivi helaki.

²⁰ E va Oa Aualari kai Iesu Keriso ve rare v'ila thank you oharo oharo mea oaria arula, heroe.

²¹ E va elarelare kiva leivahaeaki: Keriso ve ikikekela v'ila auhohi apeaki.

Keriso haela apavara mai o iele kiva leivahaeaki

²² Uavila elare vilaita ve oharo iapai leivahaeaki, Amua ve horova hoveahovea.

²³ Ehovea vila va uamari ve haro, hoveahovea Keriso ekalesia ve haro, aeva maea ve ovokake.

²⁴ Laelave, hovea hovea, Keriso va ekalesia ve akea ve, vilaita kara mea oaria ereve uavila ve akea ve.

²⁵ Vilaita, eve uavila ikiheheroe leivahaeaki, hovea hovea Keriso ekalesia ikiheroe leipe, kai elare ovokake are v'ila avarape;

²⁶ Ehovea are va ikivere arero lei hehe leikive; are va ikivere arero oharo v'ila ma hovea huhelakive;

²⁷ ehovea are va ikivere ekalesia mekakure leikive, hirihiri va karia; are va ikivere are hehe i veveroro ila leikive.

²⁸ Lahovea, vilaita ereve uavila elare maea hovea ikiheheroe leivahaeakive, heroe. Elare uva ikivere la haela elare maea kara ikivere leivila.

²⁹ Ehovea haela ae elare maea haure lei va ka, aka are arero kiva auhohi leivila; hovea hovea Amua ekalesia kiva leivila.

³⁰ Ehovea elaviila areve maea ve ukuku, areve aivau i uki ila ve eharu.

³¹ Ehovea ma, haela ae areve oa i lou ila haitapai elare uva i hareho aeakilai, erealila va aivau haroapo hovea leikilai.

³² Ma va ikihorahora leiki eharu, aka ara Keriso i ekalesia ila ve oharo hukavave.

³³ Lae vi va, e oaria, haroapo haroapo elare uva ikiheroe leiki, elare maea hovea hovea; uva kara areve vila ikivere lei oharo iapakive.