Ephesus 4 - Pupu Oharo Āre 1963 Genese 1970 Rute 1972

Aualari ve ikivere haela ikikekela haroapo avakive

¹ Laelave, ara, Amua ve hahape haela, ero ape karava maeaeaive: ero itavavahaeape la rare hoveahovea apeakive.

² E va maraha i maeoka ila leivahaeaki; heraho ve iki hairihairi va arekaea, elarelare ikiheheroe leivahaeaki; hihiri mai kalailue.

³ Mea oaria haela oaria havila ila apeaki — Ove Veveke ureve hare oaria iki haroapo hovea leivahaeaki.

⁴ Maea va haroapo; ove va haroapo — ero itavape iki kara haroapo.

⁵ Amua haroapo, ikikekela haroapo, bapatiso haroapo.

⁶ Haela oaria ve Oa Aualari haroapo; are va eharu oaria ve akea ve, eharu oaria ureve: are kai e oaria ila hareho aeavila.

⁷ Aka Keriso ve meru hovea hovea elaviila oaria areve ikiheroe meru avakilai.

⁸ Laelave oharo mari hape: Are akea pekape la hoa, Are au hahakive la mai le hahape, Kai haela oaria meru aiarape.

⁹ (Are va pekape la oharo ve iele learia? O iele, are va meahaiapo ve ipi iele oropa hoaupe:

¹⁰ au hoaupe la haela va au pekape la haela hovea hovea. Are Kaia ve akea iele pekape, ehovea eharu oaria iele havahu leikive.)

¹¹ Are uku haela aposetolo haela leipe, uku va peroveta haela, uku evanelia haela, uku va oharo haela i kilea haela ila.

¹² Ehovea hehe horova o iele leikive, ehovea basileia horova iele leikive, ehovea Keriso ve la ove maea morapaeakive.

¹³ Aiai elaviila oaria ikikekela haroapo hovea hovea leivahaeakive; Aualari ve Akore iele ore leikive, aiai haela oaria mekaka leivahaeakive, Keriso ve la mekakure iele hovea hovea.

¹⁴ Elaviila aireaki akoremari titaeka hovea leivahaea v'arekaea. Elaviila iki helari helari mai kahara — oharo lahua lahua elaviila iapavahaea v'arekaea, haela ve amuraeaki oharo kekela v'arekaea, haela ve hehepo elaviilara kari auvahaea v'arekaea, ehovea ere va ikivere haela amuraeakive.

¹⁵ Elaviila ikiheroe leivahaeai o iele hukavakilai; aeva elaviilave haro iele, Keriso, ve mai hovea hovea leivahaeakive.

¹⁶ Hovea hovea, maea hareho ve aheke ma — areve hakakaea au kopererea horova hovea hovea leilula, ehovea hakakaea oaria elare horova auhohi leilula; lahovea elaviilave ekalesia ve maea areve ikiheroe ve oki ve aheke veveke le leikilai.

Overa okiharo, okiharo are.

¹⁷ Laelave — arave oharo aeva ma, Amua oropa ve, e va ita lahua haela oaria ve pelaea mai kalaivahaelue.

¹⁸ Ereve iki muru iele, ere va Aualari ve ovokake ve apehai iele, ehovea ereve ikihaveva, ehovea ereve iki ureve ovohae kariri iele.

¹⁹ Ere ehoe kelavaki haveva, laelave ere va mai heaha oaria ikivere leivahaeape, mai hirihiri i e lahua mai oaria iele.

²⁰ Aka e va Keriso laria ore au leivahaeaila.

²¹ E va areve oharo iapape ha? Are kai ero kileavahaeape ha? Ehovea o iele Iesu ve ureve aeavila.

²² E va oropa la mai heaha aukapakive, oropa hoa ve heaha la — haeae ve oki iele va la.

²³ E va iki ureve āre lei veveroro leivahaeakive heroe.

²⁴ E va mai āre leivahaeakive heroe, la va Aualari ve ikivere mai: mai veveroro i hehe iele mai.

Hare oaria ve pupu uku

²⁵ Laelave, opore mai oaria hahaure leivahaeaki. Haela oaria elarelare o iele hukavaki, ehovea elaviila oaria va iele haroapo hovea hovea.

²⁶ Hihiri mai kalaivahaelue; mai hahaeae leivahaea v'arekaea: eve hihiri karia oropa leikive, hare aire hoaukive, heroe.

²⁷ Diabolo ve oharo ka iaparue!

²⁸ Korea leipe la haela aireaki korea mai kahara. Veveke are mai horova iele lei eharu veveke karikikive; laria, are va eharu aeaki hoa are va ikivere haela le hukapakilai.

²⁹ Eve ape ve oharo heaha horera v'arekaea, aka oharo veveroro hiki, eve la oharo iapaki haela lei mekaka leivahaeakive.

³⁰ Aualari ve Ove Veveke kahararuarue; ehovea la Ove Veveke ero ovokake leikive ihova avarape.

³¹ Ikiheaha oaria, hihiri i aeha leiki mai, oharo aheke oaria, kai o heaha oaria, hahaure leivahaeaki, aeva hehepo mai oaria kara.

³² Elarelare ikiheheroe leivahaeaki, elarelare heaha hapururukaki, hovea hovea, Aualari, ehovea Keriso ve harihari, eve heaha kara hapururukape.