Ephesus 3 - Pupu Oharo Āre 1963 Genese 1970 Rute 1972

Paul ve horova Aualari ve muruhari eharu hihika leikive

¹ Ehovea ma — ara, Paul, Iesu au hahape haela hovea leipe, ehovea e ita lahua haela.

² E va Aualari ve ikiheroe meru, are e v'ila araro avikiarape, E va la oharo overa iapai ha?

³ Are araro iki ureve areve muruhari eharu amoeape (ara ma oharo perehekai ero overa maeaeape).

⁴ Laelave, e va la oharo mureaki hoa e va ore leivahaeakilai, ara Keriso ve la muruhari eharu ore le leipe.

⁵ La eharu overa hoa haela ore au leila. Ma hoa areve Ove Veveke la eharu aposetolo haela i peroveta haela ila amoeavila.

⁶ Iele ma: ita lahua haela kara basileia ve eharu i areve haruku ila, kai areve okoare kara, herehere avakilai, Iesu Keriso ve la iroro ve okiharo ve.

⁷ La iroro veveke ve horova haela ara ma, ehovea Aualari ve ikiheroe meru arave ureve horova aheke leikilai.

⁸ Ara va hehe haela oaria ve ipi iele haela, lae vi va, ma ikiheroe meru are araro avikiarape. Ara va ita lahua haela Keriso ve iroro oharo mekakure arilai.

⁹ Aeva ara haela oaria areve la muruhari eharu ve iele amoeakilai. La eharu va meahaiapo avare koare hoa ikiki mahua, Aualari ve leia muruhari aeaveape — ehovea are eharu oaria Iesu Keriso v'ila are karikivahaeape.

¹⁰ Laelave ma hoa kaia ve la Amua i aheke oaria ekalesia ve la okiharo v'ila Aualari ve ikiore eapapo ore leikilai.

¹¹ La horova ve iele are Iesu Keriso elave Amua v'ila iki overa kekelape.

¹² Elaviila areve rare iki kelavaki hoa ela areve leia hoahukakilai, kai oaoka leivahaea va ka.

¹³ Laelave ara va ikivere e va ara e v'ila heraho leiki la hoa, e ikihorahora leivahaea v'arekaea, arave ikiveveke va lae.

Ivaiva ehovea haela oaria Iroro o iele ore leivahaeakive

¹⁴ Ehovea ma, ara Amua Iesu Keriso ve Oa iele loa ari ekaopavila.

¹⁵ (Arev'ila kaia i meahaiapo ila la lalava oaria rare avape)

¹⁶ Ara velavela leivila ma — are va areve mekakure ve erohoho hovea, ero Ove ve aheke avarakilai, ehovea iki ureve iele havahu leikilai.

¹⁷ Ehovea eve ikikekela Keriso eve iki ureve aeakilai. E kara ikiheroe mai iele havahu ore la leikilava,

¹⁸ e kai hehe haela ila hareho Keriso ve ikiheroe, areve huraha, heaikiapo, karu iele, la ikiheroe,

¹⁹ haela ore havahu leikive hovea ka, aka e kai ore leikilai, ehovea Aualari ve iele eve iki ureve heloekoakive:

²⁰ Elaviila velavela leilula kai ikivere leilula eharu perehekai, hovea hovea, aeva kepea maeakoko ila aiarakive la Aualari, elaviilave iki ureve horova leivila la Aualari Aheke.

²¹ Iesu Keriso v'ila ekalesia haela arero lei morapaeaki aiai meahaiapo karia leikilai. Amene.