Ephesus 2 - Pupu Oharo Āre 1963 Genese 1970 Rute 1972

Ovokake Aualari ve Ikiheroe meru

¹ Are ero lei makukuripe; e va mai heaha i haeae oaria v'ila apihaeape haela.

² E va oropa hoa ma meahaiapo mai oaria leivahaeape — Ove heaha ve amua ve la okiharo ve. La ove ma hoa kara iapaki aue akoremari ve ureve horova leivila.

³ Elaviila oaria oropa hoa ere i hareho loa loape. Elaviila meahaiapo mai hiki ikivere leivahaeape, kai la ikivere hovea hovea horova heaha kara leivahaeape. Elaviila la hoa hihiri ve akoremari, haela oaria kara.

⁴ Aka, Aualari ikihuru eapapo leivila la Aualari, elaviilara ikiheheroe eapapo leivahaeape.

⁵ Elaviila mai heaha leivahaeape la hoa kara Are elaviilara Keriso v'ila lei makukuripe. (Eve ovokake iele va ikiheroe meru).

⁶ Are elaviilara lai urapape. Elaviila Iesu Keriso i hareho Kaia ve ita veveke avakilai.

⁷ Ehovea aireaki hoa are va areve ikiheroe meru mekakure iele, Iesu Keriso v'ila, elaviilara hihika amoeakilai.

⁸ Ehovea la ikiheroe meru ikikekela ve okiharo ve ero lei makukurikilai. Aka e havahu ve horova ka, la va Aualari ve meru iele.

⁹ Horova hiki hovea ka: haela aea leia ve pelaea lei v'arekaea.

¹⁰ Ehovea elaviila are karikivahaeape eharu, Iesu Keriso v'ila karikivahaeape aiai horova veveke leikive. Aualari elaviilave la horova mekaka oaria ikivere overa leivahaeape.

Ita lahua haela i Jew haela ila Ekalesia ureve hoa haroapo apealula

¹¹ Iki kelavaila, overa hoa e va ita lahua haela iele; aivau ve peritome mai leivahaeape la haela ero peritome aue rare itavavahaeape — la va mai ve leipe peritome.

¹² E va la hoa Keriso haveva, ehovea e va Israel ve Basileia mahokaea ve, ita lahua haela iele. Overa la okoare iele e va ore au leivahaeaila: eve oki karia; e va meahaiapo hoa Aualari karia.

¹³ Aka ma hoa e va overa apehai apearoape haela Iesu Keriso ve oki ve, areve apu v'ila maia iele ekevahaeape.

¹⁴ Ehovea are elaviilave havila — are elaviilara hiru haroapo hovea korukaiavahaeape: au hamureaki la ara are kopararapape.

¹⁵ Are kai areve aivau v'ila pupu ve elarelare hahari la haerapape, ehovea are elare maea ve haela orahokaila haroapo hovea le leipe.

¹⁶ Are la hahari le haerapape, ehovea are va ukai ukai Aualari oropa ve satauro ureve haroapo hovea leikive.

¹⁷ Are iki e apehai apealula la haela ve havila iroro ape, kai maeamaea la haela kara.

¹⁸ Ehovea elaviila Ove haroapo v'ila Oa ve la okiharo koarape.

¹⁹ Laelave e va ma hoa ita lahua i mahokaea ila haela va ka; aka e ka hehe haela ila hareho basileia haela iele. E va Aualari ve uvi haela iele.

²⁰ Eve uvi ihau aheke va aposetolo i peroveta haela ila. Iesu Keriso va la uvi ve koperereaki have la.

²¹ Uvi ukuku oaria la have, Iesu Keriso, la koperereakilava, Uvi Eapapo hehe iele le kukilai.

²² E kara la uvi ureve hoa haroapo koperereakilai: Aualari ve Ove ve Hehe Uvi hovea le leikilai.