Ephesus 1 - Pupu Oharo Āre 1963 Genese 1970 Rute 1972

Ikiheroe oharo

¹ Ara Paul, Keriso ve aposetolo horova leivila haela, ehovea Aualari ve ikivere, Ephesus apealula hehe haela, aeva Iesu ikikelavalula haela oaria, ve hohoa mave paraeaive:

² E va Oa Aualari i Amua Iesu Keriso ve ikiheroe meru i havila ila apeaki.

Aualari ve morapaeaki oharo

³ Aualari, elaviilave Amua Iesu Keriso ve Oa, lei morapaeaki, ehovea are ove meru oaria Keriso v'ila elaviilara aikiarape.

⁴ Are meahaiapo avare koare karikipe la hoa elaviilara kai ikivere leivahaeape, ehovea elaviila hehe i haeae karia ila Areve oropa ve ikiheroe mai havahu leikive.

⁵ Are va elaviilara akoremari hovea karakive ikivere leipe, Iesu Keriso ve okiharo ve, ehovea are va ikivere iele leipe.

⁶ Are va elaviilara erohoho haela hovea leivahaeape, ehovea areve ikivere haela avarape la ikiheroe meru avarape: areve rare morapaeaki.

⁷ Ehovea are i areve au hakaitapape apu, elaviila ovokake iele leilula; elaviilave mai heaha kara laria hapururukakilai, ehovea areve ikiheroe meru eapapo iele.

⁸ Are kai ikiore i mai ehoe oaria ila elaviilara kileavahaeape.

⁹ Areve muruhari ikivere elaviilara oropa ve hihika kileape, ehovea are leia ve iki veveke le leipe.

¹⁰ Ehovea are va ikivere aireaki iele horeraki hoa kaia i meahaiapo ila ve eharu oaria hoa haroapo areve ureve korukaiavahaeakive.

¹¹ Are v'ila elaviila haruku avaki haela leivahaeape. Ehovea areve ikivere horova leivila la Aualari, areve ikikekela hovea hovea, elaviilara ikivere leivahaeai hareavape.

¹² Ehovea elaviila areve mekakure morapaeakilai, ehovea elaviila Keriso oropa kelavape haela.

¹³ E kara arero ikikekelape, e va oharo iele iapape la hoa, la oharo va eve ovokake ve iroro iele. E kara aireaki iki kelavape la hoa e va Ove Veveke ve okoare ve ihova le avape.

¹⁴ La va elaviilave haruku avaki ihova, aiai la haruku iele avaki hoa; laria elaviila areve mekakure iele morapaeakilai.

Aualari ore leiki ivaiva

¹⁵ Ara eve Amua Iesu ikikelavaki hari overa iapai, eve hehe haela oaria kiva keikive mai kara.

¹⁶ Ara e v'ila mea oaria Aualari thank you oharo avila, kai e v'ila mea oaria ivaiva leivila,

¹⁷ Ehovea elaviilave Amua Iesu Keriso ve Aualari, Oa mekakure iele, ikiore ove i areve ovava hihika ila ero aiarakilai.

¹⁸ E va iki ureve ovava la leivahaeakilava, e va areve itavaki ikivere okiharo ve iele ore leivahaeakilai: areve hehe haela ve haruku ve erohoho mekakure kara.

¹⁹ Are elaviilara aikiarape la aheke iele, ehovea elaviila va iki kelavalula haela, areve horova aheke kara hoveahovea.

Keriso ve api kai urouki maea Aualari ve aheke hihika leive

²⁰ Are Keriso v'ila leipe la horova ehovea are arero kapu ve lai urapape, kai arero kaia ve leia areve mai ore ukaki ve haiavakive avarape.

²¹ Areve Rare va akea iele, meahaiapo amua i aheke i oropa haela oaria va ipi ve: au itavalula la rare oaria, meahaiapo hoa i aireaki kaia ve basileia ve hoa, va ipi iele, areve rare akea ve.

²² Are eharu oaria areve loa ipi ve aipevahaeape, kai arero ekalesia oaria ve haro leikive avarape.

²³ La ekalesia va areve maea hovea, are havahu lei aheke leipe la ekalesia.