Colossae 3 - Pupu Oharo Āre 1963 Genese 1970 Rute 1972

Keriso i hareho api kai uroukive, heroe

¹ E va Keriso i hareho api kai uroukive la leikilava, akea ve eharu haropaki. Leia Keriso Aualari ve mai ore ukaki haiavavila.

² Kaia ve eharu iki kelavaila, meahaiapo ve la eharu v'arekaea.

³ Ehovea e va apihaeape haela: eve ovokake Keriso v'ila Aualari ve ureve avarapape.

⁴ Keriso, elaviilave ovokake iele, hihika la leikilava, e kara are i hareho haharika mekakure la hoa hihika avakilai.

⁵ E va meahaiapo ve la eharu heaha haeakive, heroe, korea mai, hirihiri mai, ikiheaha mai, heaha ikivere mai, haela ve eharu ikivere mai, opore Aualari kekelaki mai:

⁶ Ehovea ma hahaeae oaria iapaki aue akoremari Aualari ve hihiri koarakilai.

⁷ E kara oropa hoa la mai hahaeae leivahaeape, e va ma eharu ila apearoape la hoa.

⁸ Ma hoa la eharu hahaure leivahaeaki, hihiri, ikiheaha, hehepo, o vere, ape oharo hirihiri,

⁹ Elarelare opore kavahailue, ehovea e oropa heaha hoa i horova heaha ila aikilapape.

¹⁰ E va haela āre hovea leivahaeape, āre leipe iele ehovea arero karikipe la haela ve ikiore hovea avape.

¹¹ Ma āre hoa Greek i Jew haela ila lahua apea va ka. Peritome i peritome aue ila lahua lahua va ka, merava haela, Scythia haela, au hahape haela, amua haela, ere oaria hoveahovea apearo.

¹² Ehovea e va Aualari ve ikivere haela, hehe i mekaka iele, e va ikihuru kai ikiheroe kai maeoka kai makiri kai ikihairihairi leiki aue mai ila kiva auhohi leivahaeaki.

¹³ Elarelare ikiheroe mai leivahaeaki kai elarelare heaha hapururukaki: haela ae haela ae heaha leiki la hoa, Amua eve heaha hapururukape hovea, e kara laria leivahaeaki.

¹⁴ Oropa iele, ikiheroe havahu mea oaria leivahaeaki, la va mai mekakure iele.

¹⁵ Keriso ve havila eve iki ureve kiva leikive; ehovea la, e va maea haroapo hovea karikipe. E kai Aualari ve thank you oharo arive.

¹⁶ Keriso ve oharo eve ureve ikiore ila avaki. E kai elarelare kileaki mai maria: Buka ve oharo mureaki, hivi mekaka helaki, Ove Veveke ve la hivi mekaka: eve iki ureve Aualari ve ikiheroe meru aeakilai.

¹⁷ Eve horova i oharo oaria ila Amua Iesu ve Rare v'ila leivahaeaki — Iesu v'ila Oa Aualari thank you oharo mea oaria arive.

Keriso haela apavara mai o iele kiva leika

¹⁸ Uavila, eve vilaita ve oharo iapai kiva leivahaeaki, Amua ve oropa ve haela laria.

¹⁹ Vilahoaha uavila ikiheheroe leivahaeaki, erero ikiheaha kalaivahaelue.

²⁰ Akoremari, Oa i lou ila ve oharo iapaki, ehovea Amua ve ikivere mai laria.

²¹ Oa oaria eve akoremari naoae hihiri leivahaeai amuraea va arekaea, ere va iki heraho leivahaeaki ave.

²² Horova haela, eve meahaiapo oki ve horova amua ve oharo iapai leivahaeaki. Haela ve ikivere hiki kekela va ka, aka iki ehoe ila, Amua ve ikikekela mai hovea.

²³ E va horova la leivahaeakilava, horova aheke leivahaeaki, Amua ve ikivere kekelaki, haela ve ikivere va ka.

²⁴ Ehovea e v'ore e va Amua ve aireaki haruku mekakure avakilai. E va Keriso Amua ve horova leivahaelula.

²⁵ Ehovea haeae leiki la haela, are haeae ve kavale avakilai: kai Aualari haela ve maea lahua lahua kekela va ka.