Colossae 2 - Pupu Oharo Āre 1963 Genese 1970 Rute 1972

¹ Ara va ikivere e ore leivahaeakive, ara e v'ila heraho leivila, Laodicea la haela kara, aeka arave aivau ve oropape au eavaila la haela oaria kara.

² Ara v'ikivere erero hakakaeakive, ere va ikiheroe mai v'ila iki haroapo hovea leivahaeakive. Ere kai ikiore la erohoho koarai Aualari ve au avarapape la eharu, Keriso iele la, ere ore leivahaeakive, heroe.

³ Ehovea areve ureve iki ore i ovava ila ve erohoho oaria au aiarapape.

Keriso i hareho aeaki mai: Opore ikiore kiva leiki

⁴ Ara ero maria maeaeaive — ehovea haela ve ape oharo veveke ero amuraeaki ave.

⁵ Arave maea va e v'ila apehai ve, aka arave ove e i hareho aeavila. Ara va eve horova veveke i Keriso ve ikikekela aheke ila eavi iki veveke mea oaria leivila.

⁶ Laelave, hovea hovea, e Amua Iesu Keriso avape, laria, eve mai oaria leivahaeaki.

⁷ Eve ihau i uvi ve aheke ila are havahu, laelave, eve ikikekela aheke leivahaeaki, ero kileavahaeape la okiharo hovea hovea: e kai Aualari momorapuki.

⁸ E kiva leila, haela ae opore ikiore i ikipelaea ila ero haeae kari auvahaeaki ave: haela ve mai heaha i meahaiapo ve haeae oaria ila ve oharo iapaki ave, kai Keriso haure leiki ave.

⁹ Ehovea Keriso ve ureve Aualari ve iele hoa haroapo le korukaiavahaeape.

¹⁰ E va areve ureve aheke avakilai, ehovea are va ove amua i aheke oaria ila ve haro iele.

¹¹ E va arev'ila peritome mai avape, mai ve au leikiaue la peritome. La va iele aivau ve maea haure leiki peritome, Keriso ve peritome iele.

¹² Eve bapatiso hoa are i hareho karu ihape. E kai are i hareho uroupe, ehovea e Aualari ve horova iki kelavape. Aualari arero api hoa ve lai urapape la horova.

¹³ E kara, oropa apihaeape haela, ehovea aivau ve mai heaha i peritome aue mai ila are ero are i hareho lei makukuripe: ehovea are elaviilave mai heahaha oaria hapururukape.

¹⁴ Are elaviilara hahaeape la pupu hapururukape, ehovea la eharu elaviilara hihiri hovea leivahaeape, eve la eharu heaha are hareavi satauro akea ve karahe le koape.

¹⁵ Are arero aeha leivahaeape la ove amua oaria heaorapape: are erero heaorapape la horova hihika iele amoeape, ere v'ila pelaea hovea leipe.

¹⁶ Laelave, eapai i ma ila, hurae hare i papare hoa ila, kai sabati hare v'ila kara, haela ero heheava va arekaea.

¹⁷ La eharu va aireaki kihoreraki eharu ve ove hiki, iele ka, aka maea iele va Keriso ve.

¹⁸ Haela ae opore maeoka ve oki ve, aka aneru morapaeaki mai ve, aka ivahi lahua lahua ve pelaea, areve ikikekela haeae v'ila, eve la meru mekakure hareava v'arekaea.

¹⁹ Lahovea haela Keriso, elaviilave Haro auhohi ava va ka. Ehovea la Haro v'ila maea ve eharu oaria, areve elele oaria ve la okiharo, aheke lei aheaukilai.

²⁰ E va meahaiapo la heaha oaria haitapape ehovea e Keriso ila hoa haroapo apihaeape. Laelave meahaiapo ve la pupu ero hahaealula ehovealeve?

²¹ Maria pupu iapakive ehovealeve: Mai kapaealue! Kalelue! Mai kohahararue!

²² (Ma eharu horova leiki hoa va poae leilula). Leia va haela ve ikivere pupu i kileaki oharo hiki.

²³ Iele, ereva perehekai ikiore hovea, ehovea ere v'ila uku haela ivaiva kiva leilula, kai maeoka leilula, kai maea va aheke kiva leilula. Aka ma pupu aivau ve ikivere hoa aheke hovea lei va ka.