Colossae 1 - Pupu Oharo Āre 1963 Genese 1970 Rute 1972

Ikiheroe oharo

¹ Ara, Paul, Aualari ve ikivere leipe Iesu Keriso ve aposetolo haela, kai apoheari Timothy,

² Colossae apealula hehe haela i iki kelavalula haela ve oharo mave paraeaive. Elaviilave Oa Aualari ve ikiheroe meru i havila ila e i hareho apeaki;

Thank you oharo i ivaiva ila

³ Ela Amua Iesu Keriso ve Oa Aualari e v'ila, thank you oharo arula, kai e v'ila mea oaria ivaiva arula,

⁴ Ehovea e va Keriso Iesu kelavalula, kai hehe haela mea oaria ikiheheroe leivahaelula, ela laria iapape,

⁵ Ehovea e va kaia ve aireaki avakive la mekakure mea oaria ikivere leilula: e va la iroro oharo iele oropaki iapape.

⁶ E va la iroro oharo iapape, hovea hovea, ita oaria are va ahai eapapo leivila: are kai eve ureve laria leivila, eva oropa iapape kai Aualari ve meru iele avape la hoa ikiki mahau,

⁷ La oharo kara ela iki havahu horova kake Epaphras ero kileape, ehovea are va Keriso ve horova haela veveke, e v'ila.

⁸ Are kara eve Ove ve ikiheroe mai elaro kileape.

⁹ Laelave ela hare oaria e v'ila ivaiva leilula, kai velavela leilula maria — e va Aualari ve ikivere ore leivahaeakilai, kai iki ureve ovava iele heloekoakilai.

¹⁰ E va Amua ve mai ehoe kiva auhohi leivahaeaki; eva horova mekaka oaria leivahaeaki, aeva Aualari ve ikiore eapapo avaki.

¹¹ Are ero lei aheke leivahaeaki, areve la aheke mekakure hovea hovea. E kai heraho hoa aheke i ikiveveke ila apeaki.

¹² E va Oa, thank you, ivaiva avahaeaki. Are elaviilara karikivahaeape ehovea hehe haela ila hareho ovava ve haruku herehere avakive.

¹³ Are elaviilara murumuru ve aheke ve hareavi are iki havahu Akore ve basileia haela hovea koelaripe.

¹⁴ La Akore elaviilara lei makukuripe, elaviilave mai heaha kara are hapururukape.

Keriso ve iele i horova ila

¹⁵ Are va Aualari ve maea hovea, au karikipe haela ve oropa haela va la.

¹⁶ Ehovea Aualari areve ureve eharu oaria karikivahaeape — kaia i meahaiapo ila ve eharu oaria, hihika i muruhari ila la eharu oaria, amua haela i gavana haela ila, oropa haela i akea haela ila oaria kara — eharu oaria are v'ila karikivahaeape.

¹⁷ Are va eharu oaria oropa ve, kai eharu oaria ve iele areve ureve aeave.

¹⁸ Are va ekalesia maea ve haro — are va oropa iele, apape hoa ve epape, ehovea are va eharu oaria ve akea ve leikilai.

¹⁹ Ehovea Oa ve ikivere areve ureve eharu oaria ve iele hoa haroapo aeakilai:

²⁰ Aeka are v'ila eharu oaria lei mekaka leivahaeakilai. Ehovea are areve satauro ve apu v'ila havila le leipe. O iele, areve ureve meahaiapo i kaia ila ve eharu oaria iele leivahaeape.

²¹ E kara, oropa hoa haela lahua iele, ehovea e va mai heaha v'ila areve iri haela hovea leivahaeape; ma hoa are ero areve haela hovea karikivahaeape.

²² Are va ma hoa areve meahaiapo maea ve apape hoa ve la okiharo v'ila, ero Aualari ve haela hovea koelaripe; are ero hehe i mekaka i veveroro ila areve oropa ve kari pekape.

²³ E va ma hoa iki auhohi kelavaki, aheke i veveke ila apeaki. Iroro oharo hakurepa v'arekaea. Kaia ve ihau ve ita oaria ape la iroro oharo va la. Ara, Paul, ara va la iroro oharo ve horova haela.

Paul Iesu ve horova herehere leivila

²⁴ Ara e v'ila arave kakare ve ikiveveke leivila. Ara va ikivere arave maea v'ila Keriso ve la kakare hareho koarakive, ehovea areve maea, ekalesia va la, ovokake leikive.

²⁵ O iele, ara va areve horova haela leipe, Aualari e v'ila araro avikiarape horova la, Aualari ve oharo iele kileakive.

²⁶ Overa vilakao oaria haveva leivahaeape la iele ma hoa areve hehe haela ore leivahaeape.

²⁷ Ehovea Aualari va ikivere ere ore leikive lela erohoho eharu mekakure ita lahua haela are v'ila avakilai. La va iele, Keriso eve ureve aeakive, mekakure leiki okiharo.

²⁸ Ela areve iroro arula, ela va haela oaria ma ikiore okiharo kileavahaelula, ehovea ela v'ikivere haela oaria Keriso ve mekakure hovea hovea leivahaeakive.

²⁹ Ehovea la, ara kara horova aheke leivila, ara va iki heraho leivila, ehovea are arave ureve horova aheke leivila.