Apokalupto 9 - Pupu Oharo Āre 1963 Genese 1970 Rute 1972

¹ Aneru aeva puva hohoape, la hoa, ara kaia ve meahaiapo kihoaupe kou eavape. Are ipi karia la karu ve key avape.

² Are ipi karia la karu key ila hahape. Mahuvu eapapo la karu ve pekape, a eapapo ve mahuvu hovea, aiai hare kai mea kara karu ve la a mahuvu v'ila muruka leivahaeape.

³ La mahuvu ve marere oaria meahaiapo ve kihoahukape. Erero aheke avarape, meahaiapo ve aukara ve aheke hovea.

⁴ Erero pupu maria huape: Ere va hohe kai kolo oaria kai kora kara heaha kalaivahaelue, hevere akea ve Aualari ve ihova au availa la haela hiki.

⁵ Ereve pupu aeka maria: Erero kahaealue, aka papare hue ila erero au hiki hararuakive — ereve la kakare va aukara buravape haela ve kakare hovea.

⁶ La hoa, haela oaria apaki hoa ikivere leivahaeakilai, aka apaki hoa koara va ka. Ere va apihaeakive ikivere leivahaeakilai, aka ere apihaea va ka.

⁷ La marere va maea va mare avahaeaki horse ve maea hovea hovea. Ereve haro gold korona korape, ereve oropape va haela ve oropape hovea.

⁸ Ereve haro kolo uavila ve haro kolo hovea hovea, ereve kao va lion ve kao hoveahovea.

⁹ Ereve maea korepaka kohahape, auri korepaka aheke iele. Ereve maho ve uara va horse oaria i chariot ila mare ve hoahukakive la karakara hovea hovea.

¹⁰ Ere va aue ila, aukara ve aue hoveahovea: ereve aue va hihe ila: ereve aheke ma papare hue ila haela au hiki hararuakive.

¹¹ Ere ka amua ila, are va ipi karia la karu ve aneru: areve Hebrew uri rare va Abaddon, aka areve Greek uri ve rare va Apollyon.

¹² Ikihuru haroapo karia leilai: aireaki ikihuru orahokaila le apearo.

¹³ Aneru aeva puva hohoape, la hoa — Aualari oropa ve arura haha ve la haro karahe hari ila ve leia, ara va āra haroapo iapape:

¹⁴ Are puva ila la aneru mari maeape, Euphrates mai eapapo leia, au hahape aneru hari ila hehelaukaki.

¹⁵ La aneru hari ila le hehelaukape: ereve horova ma: hora haroapo kai hare haroapo, kai papare haroapo, kai hitolo haroapo, haela ve hiru aea haeakive.

¹⁶ Horse ila la hevehe haela oaria ve numera va 200,000,000. Ara ereve numera iapape.

¹⁷ Ara va horse oaria eavavahaeape laria, ereve horeavaki haela kara. Ereve korepaka va a uru ve ovoka hovea, jacinth kai brimstone hovea. Horses ve haro va lion ve haro hoveahovea; ereve ape ve kihoreavape eharu va a uru i mahuvu i brimstone ila.

¹⁸ Ma eharu heaha ilehoila haela va hiru aea haeape, a, kai mahuvu, kai brimstone ila.

¹⁹ Ehovea ereve aheke va ape i aue ila ve. Ereve aue va ekaroa hoveahovea, haro ila, kai ereve horova heaha leivahaeaki eharu va la.

²⁰ Aireaki, ma eharu heaha au leivahaeaila haela uku, ere ereve mai ve horova heaha ve iki au helarivahaeaila. Ere va haelaharihu, auro kai ario kai berasi kai have kai kora ila la harihu ve morapaeaki mai au hakurepaila, ehovea la eharu ovohae eava va ka, kai oharo iapa va ka, kai loa loa va ka.

²¹ Ere va haela haeape la mai ve, kai airi pavora mai ve, kai korea mai ve, ikihuru au leila, kai iki au helarivahaeaila.