Apokalupto 8 - Pupu Oharo Āre 1963 Genese 1970 Rute 1972

Puva parae ila hohoape

¹ Are kokaukaki eharu ae va hapape la hoa kaia ve leia oharo oaria karia leilai, haela oaria muruha hiki apeape, hora hapu hovea.

² Ara Aualari oropa ve epavavahaeape la aneru 7 ila ovohae eavavahaeape: Ere erero puva 7 ila aiarape.

³ Aneru aea iki arura haha maeamaea epavape, are muramura ila gold haru mai paeape. Ere arero muramura oaria aiarape, ehovea la muramura i hehe haela oaria ve ivaiva ila arura haha ve aipevahaeakive — terona oropa ve la gold arura haha.

⁴ La muramura ve mahuvu, hehe haela ve ivaiva ila hareho la aneru ve mai ve Aualari oropa ve pekahavape.

⁵ Aneru la muramura haru kaivi arura haha ve la a heloekoape, kai meahaiapo ve koape. Ara oaria, kai kaia hi, kai kevao oaria, kai mea puipui horeavape.

⁶ Puva 7 ila la aneru 7 ila puva hohoakive elare maea karikivahaeape.

⁷ Oropa aneru puva hohoape — la hoa, lai aheke i a ila, apu kara, hoa haroapo meahaiapo akea ve oaupe: aeva meahaiapo ve ukai uku a le hape, la ukai ve kora i hohe ila ahihiru ahihiru ila a le haeape.

⁸ Aneru aeva puva hohoape, la hoa, a hahavila kela eapapo ahea ma ve le hilaupe — ahea ma ve ukai uku apu hovea leipe.

⁹ La ma ve ukai ve ovokake eharu oaria hai ka leivahaeape, la ukai uku vevaea oaria kara.

¹⁰ Aneru aeva puva hohoape, la hoa, kaia ve kou eapapo, hehaa eapapo hovea, oaupe: are va mai ma uku akea ve oaupe kai mai ma ve kue oaria kara.

¹¹ La kou ve rare va, Kora kaeake. Laelave, ma ve hiru aea kaeake havahu le leipe, haela oaria kara apihaeape ehovea kaeake leipe la ma.

¹² Aneru aeva puva hohoape, la hoa, eharu ae hare ve hiru aea koape, papare ve hiru aea kara; laelave ereve la hiru aea muruka leivahaeape, hare hoa kara hare au heauapaila, papare kara laria.

¹³ Ara ovohae eavape, kai maria iapape — Aneru haroapo kaia ve hihi ve maho vivila āra eapapo maria itavape, Ikihuru, ikihuru, ikihuru hela, meahaiapo apealula la haela, ehovea aireaki puva hohoaki la aneru ilehoila aea.