Apokalupto 7 - Pupu Oharo Āre 1963 Genese 1970 Rute 1972

144,000 ihova avape haela

¹ Ma eharu karia leivahaeape, la hoa, ara aneru hari ila eavavahaeape: ere va meahaiapo ve kao kao epavavahaeape: ere kai meahaiapo ve mea hari ila mai papaehaupe, mea aea meahaiapo aka ahea ma, aka kora aeva koaki ave.

² Ara aneru aeva eavape — are kauri ukai ve kihoaupe: Are va ovokake Aualari ve kokaukaki eharu aeva mai paeape. Are aneru hari ila āra hai itavape, meahaiapo i ahea ma ila heaha leiki horova avarape la aneru.

³ Areve oharo maria, Meahaiapo kai ahea ma kai kora oaria heaha kalaivahaelue aiai ela va Aualari ve horova haela oaria hevere ve ihova leivahaeakive.

⁴ Ihova leivahaeape la haela ve numera ara iapape — Israel ve Akoremari oaria va 144,000.

⁵ Judah ve la hiru va 12,000 haela ihova leivahaeape: Reuben ve hiru va 12,000, Gad ve hiru va 12,000,

⁶ Asa ve la hiru va 12,000 haela ihova leivahaeape: Nephthalim la hiru va 12,000; Manasses ve hiru va 12,000:

⁷ Simeon ve hiru va 12,000 haela ihova leivahaeape: Levi ve hiru va 12,000: Isachar ve hiru va 12,000:

⁸ Zabulon ve hiru va 12,000 haela ihova leivahaeape; Joseph ve hiru va 12,000; Benjamin ve hiru va 12,000.

Kaia akea ve lei ovokake leivahaeaki haela ve ivahi

⁹ Ma eharu karia leivahaeape la hoa — Iapaila, ara ovohae eavape haela maeokoko havahu iele, ereve numera haela au kaoakive hovea ka, vila‐ipipi oaria kai hiru lahua lahua oaria ve, uri kara lahua lahua oaria ve. Ere va terona i Mamoe Akore oropa ve epavavahaeape. Ereve maea pura houhuka kohahape; ere kai laa kolo mai papaehaupe.

¹⁰ Ere āra hai eapapo itavavahaeape maria, Elave terona akea ve haiavavila Aualari i Mamoe Akore ila elaro lei ovokake leivahaeape.

¹¹ Aneru oaria terona kai haela hoaha kai ovokake eharu hari ila helari hupakai epavavahaeape. Ere va oropape ekaopi Aualari momorapupe.

¹² Ereve oharo maria, Amen: Elave Aualari va ikihuru iele kai rare veveke kai ikiore, kai morapaeaki oharo, kai aheke, kai ahea ila aiai karia lei va ka. Amen.

¹³ Haela hoaha ve haela ae araro kimaeape, Ma va pura houhuka ila leita haela ha? Ere va lahoa ve ekevahaeape ha?

¹⁴ Ara arero kavale maeape: Haelapo, a v'ore. Are araro kimaeape, Ma va heraho eapapo koaravahaeape haela oaria: Ere ereve pura Mamoe Akore ve apu v'ila huhelavahaeape, Ereve pura la apu v'ila houhuka havahu leivahaeape.

¹⁵ Laelave, ere va Aualari ve terona oropa ve apealula, Ere va hare i oroa ila hehe uvi ureve horova leilula, Terona akea ve haiavaki la Amua ere i hoa haroapo aeakilai.

¹⁶ Ere va aireaki hoa eroa haha va ka, ma karave koa va ka; Hare ve ovava i ahea ila erero aireaki haea va ka;

¹⁷ Ehovea terona oropa ve aeavila la Mamoe Akore erero eapai aiarakilai. Are erero ovokake ma ve la ita veveke kari aukilai. Aualari kara ereve ovohae ve o ma lei kakarara leikilai.