Apokalupto 6 - Pupu Oharo Āre 1963 Genese 1970 Rute 1972

Kokaukaki eharu ve hapaki hoa

¹ Mamoe Akore kokaukaki eharu haroapo helaukape la hoa, ara ovohae eavape, ara iapape, Kaia kukururu hovea, ovokake eharu haroapo mariape, Iki ovohae eavaila.

² Iapaila, ara horse houhuka eavape. La horse akea ve haiavape la haela va apo ila: Ere arero korona avarape. Are hahari ve hoai haela oaria heaorapape.

³ Aire kokaukaki ae va helaukape la hoa, ara ovokake eharu ae ve oharo iapape maria, Iki ovohae eavaila.

⁴ Horse aea kara hoaupe — la horse va ovoka: areva akea ve haiavape la haela aheke avape ehovea meahaiapo ve havila hareavakive, kai haela oaria elarelare hahari haeakive. Ere arero lelao eapapo avarape.

⁵ Kokaukaki eharu aeva helaukape la hoa, ara ovokake eharu ae ve oharo maria iapape, Iki ovohae eavaila. Iapaila, ara ovohae eavape — horse uruka, areve akea ve haiavape la haela mehau heheavaki eharu mai paeape.

⁶ Ovokake eharu ve hihi ve āra maria hape, Wheat hae hiru haroapo ve kavale penny haroapo, barley hae hiru haroapo ve kavale denarius haroapo; aka corn i wine ila heaha kalailue!

⁷ Kokaukaki eharu ae va hapape la hoa ara ovokake eharu ae ve oharo maria iapape, Iki ovohae eavaila.

⁸ Ara ovohae eavape — horse haroapo, kairuka; areve akea ve haiavape la haela ve rare va, Apaki hoa, Hell areve aire aupe. Erealila meahaiapo ve ukai hiki heaorapape, ehovea haela haeakive. Erealila ve haeaki eharu va lelao kai eroa, kai apaki hoa, kai meahaiapo ve animala aeha iele.

⁹ Kokaukaki eharu ae va helaukape la hoa, ara arura haha ipi ve eavape — au haeape haela oaria ve ove. Ere apihaeape ehovea ere Aualari ve oharo kiva leivahaeape, kai o iele vavavape.

¹⁰ Ere oaria āra hai maria itavape, Hehe i O iele Amua: Haiapo iele A va meahaiapo apealula la haela elave apu v'ila heheava va ka.

¹¹ Pura houhuka heahapiki erero aiarape: erero maeaeape oharo maria: Iki perehekai paparaehakive aiai ereve kake haela i apoheari oaria ila aireaki apihaeakilai, ereve la maea hovea hovea.

¹² Are kokaukaki eharu ae va helaukape la hoa ara ovohae eavape maria: Mea puipui eapapo leipe: hare va muruka eapapo leipe, mamoe kolo uruka hoveahovea, papare kara apu ve maupa hoveahovea.

¹³ Kaia ve la kou oaria meahaiapo ve hohoape, lauka kora ve lauka hihia oaukive hovea; mea eapapo arero lalaeapaki la hoa.

¹⁴ Kaia kara lakoripe, au lakoripe kile hovea. Kela i hiru oaria ila elare ita ve le hareavape.

¹⁵ Meahaiapo amua oaria, kai akea haela oaria, kai erohoho haela oaria, kai hevehe haela ve kapena, kai haela aheke oaria, kai horova haela, kai haelapo oaria — ere oaoka lei hukaupe — kai kela ve la have ura oaria au araupe.

¹⁶ Ere kela maeaeape, Elave akea ve oaukive: terona akea ve haiavaki la haela ve oropape ve elaro aiarapakive, kai Mamoe Akore ve hihiri ve.

¹⁷ Ehovea areve hihiri leiki hare eapapo le kihorera — Leita haela aheke epavakilai ha?