Apokalupto 5 - Pupu Oharo Āre 1963 Genese 1970 Rute 1972

Aualari ve Mamoe Akore ve ivahi

¹ Ara eavape, terona akea ve haiavape la haela ve mai ore ukai buka paeape: La buka ve pepa hohoa ukai ukai haeape; la buka va kokaukape eharu 7 ila.

² Ara va aneru aheke iele eavape; are āra hai itavape maria: Leita hovea ha, buka hapakive, kai kokaukaki la eharu hehelaukakive ha?

³ Aka kaia ve kai meahaiapo ve kai meahaiapo ureve haela oaria hovea hovea au leila, ehovea buka hapakive kai ureve eavakive.

⁴ Ara hi eapapo ape, ehovea la buka hapai eavakive hovea haela karia.

⁵ La hoa, haela hoaha ve haela ae araro kimaeape, Hi kailue. Judah hiru ve Lion, David ve meamari, are va hoveahovea la buka hapakive, kai kokaukaki eharu 7 ila hehelaukakive.

⁶ La hoa, terona oropa ve, eharu 4 ila hoa haroapo, au epavila mamoe akore ara eavape, huru hape mamoe hovea: are va haro karahe 7 ila, kai ovohae 7 ila. La va Aualari ve Ove 7 ila, meahaiapo ita oaria paparaehape la Ove 7 ila.

⁷ Are iki terona akea ve haiavape la haela ve mai ore ukai ve la buka kaivape.

⁸ Are buka kaivape la hoa — ovokake eharu 4 ila kai haela hoaha 24 ila, Mamoe Akore oropa ve ekaopape. Ere va haroapo haroapo auri hivi ila, kai gold haita muo veveke muramura ila, mai papaehaupe: La muramura va hehe haela ve ivaiva ve ihova.

⁹ Ere va hivi are helavape maria: A va hoveahovea buka kaivakive, kai kokaukaki eharu hehelaukakive, Ehovea ere aro hape. A va ave apu kara vila‐ipipi oaria, Kai uri oaria, kai ita lahua lahua haela oaria Aualari ve la ovokake aikiarape.

¹⁰ A va elaro Aualari ve Amua i Oharo Haela ila leivahaeape. Ela va meahaiapo ita oaria ve Amua hovea leivahaeakilai.

¹¹ Ara ovohae eavape, ara aneru oaria ve hivavara, terona ukai ukai ve iapape, ovokake eharu i haela hoaha ila ve kara, haela maeokoko havahu iele: ere va āra eapapo ila hivi mari helavape,

¹² Au hape la Mamoe Akore hovea hovea iele, ehovea aheke kai erohoho, kai ikiore kai ahea, kai haharika, kai morapaeaki oharo.

¹³ Ara iapape, kaia ve kai meahaiapo ve kai meahaiapo ureve, kai ahea ma ve kai ahea ma ureve, au karikivahaeape eharu oaria ve oharo, maria: Terona akea ve haiavaki la Amua kai Mamoe Akore kara lei morapaeaki, aheke i ahea ila aiaraki aiai karia lei va ka.

¹⁴ La hoa ovokake eharu 4 ila maeape: Amene. Haela hoaha 24 kara ekaopi mea oaria aeavila la Amua morapaeape.