Apokalupto 4 - Pupu Oharo Āre 1963 Genese 1970 Rute 1972

¹ Ma eharu karia leilai, ara kaia ve au hapape okiape eavape. Ara overa iapape la āra, puva hi hovea, araro aeka maeape, Maia kivikaki, ara va aireaki kihoreavaki eharu oaria aro amoeakilai.

² Ara hoa haroapo ove ila leipe. Iapaila: Kaia ve terona lei urapape. Haela haroapo la terona akea ve haiavape.

³ Areve maea va aitave hae mekakure hovea — biae mekakure iele terona helari hupakaeape.

Kaia ve ivahi

⁴ Terona 24 kara la terona eapapo helari hupakai apearoape. La terona akea ve haela hoaha 24 avape, ereve maea pura houhuka kohahape, korona gold maupa ila ereve haro korape.

⁵ Kevao terona ve makaeape, āra kara, kaia hi kara. Terona oropa ve hehaa 7 ila ehoaha ovava eapapo ila haeape, la va Aualari ve Ove 7 ila.

⁶ Terona oropa ve kara — ma haru eapapo alalaka iele aeaveape. La terona i haela hoaha ila ve aru hihi ve, ovokake eharu 4 ila, ereve maea va ovohae oaria ila, oropaki kai aireaki ve.

⁷ Oropa ovokake eharu va lion hovea, aire la ovokake eharu va boromakau hovea, areve aire ve ovokake eharu va haela ve oropape hovea, kai aireaki la eharu va urai vivilavila harapa hovea.

⁸ La ovokake eharu oaria va maho 6 ila; ereve maea hareho kai maho ipi ve kara ovohae oaria — hare oaria, oroa oaria kara, ere āra hai itavape maria, Amua Aualari, hehe, hehe, hehe iele: A va overa hoa kai ma hoa, kai aireaki hoa, au hiki aeavila.

⁹ La ovokake eharu Terona akea ve haiavaki mea oaria aeavila la Amua momorapupe la hoa.

¹⁰ Haela hoaha 24 kara terona akea ve haiavavila mea oaria aeavila la Amua oropa ve ekaopape, ehovea arero morapaeakive. Ereve korona terona oropa ve koavape: ereve oharo maria:

¹¹ Elave Amua Aualari, A va mekakure aheke ila, Ave rare lei morapaeaki — ehovea A va eharu oaria karikivahaeape: A havahu ikivere leipe: laelave a va eharu oaria au karikivahaeape.