Apokalupto 3 - Pupu Oharo Āre 1963 Genese 1970 Rute 1972

Sardis Ekalesia paraeape hohoa

¹ Sardis ekalesia ve la aneru ve hohoa maria paraeaki: Aualari ve Ove 7 i kou 7 ila aeape haela ma. Ave horova oaria ara v'ore. Ave rare va ovokake haela, aka o iele a va huru iele.

² Urouki, ovokake iele leiki, aeva kepea eharu kiva auhohi leiki, apaki maeamaea la eharu: Ehovea ara eavape — ave horova oaria Aualari ve oropa ve mekaka ka.

³ Ore overa leivahaeape la eharu iki auhohi kelavaki; mea oaria erero iki alalakive, kai iki helarikive. A va kiva leiki aue la leikilava, ara ave leia muruhari pekakilai, korea haela hovea. A v'ore va ka arave pekaki hare, oroa la aka hare la.

⁴ Sardis kara, ereve ihova hirihiri au leila haela uku apearo. Ere va ara i hoa haroapo pura houhuka ila loa loakive, ehovea ere va haela mekaka iele.

⁵ Heaorapaki haela pura houhuka oreaukilai; ara areve rare ovokake la buka ureve hapururuka va ka. Arave Oa i aneru oaria oropa ve ara are v'ila vavavakilai.

⁶ Avako ila la haela oaria, Ove ekalesia oaria kileaki la oharo auhohi iapaila:

Philadelphia Ekalesia paraeape hohoa

⁷ A Philadelphia ve ekalesia ve aneru ve maria oharo haeakive: Ma va hehe iele ila la Amua ve oharo: David ve la key kiva leivila la Amua — are va la hapakilava kai haela ae kokauka va ka. Are la kokaukakilava, haela ae hapa va ka.

⁸ Ara ave horova oaria ore: ara ave oropa ve okiape le hapai — haela ae la okiape kokauka va ka — ehovea ave aheke perehekai, aka ava arave oharo kiva leipe, kai araro haure au leila.

⁹ Satan ve synagogue uku elare rare Jew haela rare arula, aka ere va opore iele, ere Jew haela va ka. Ara erero ahilakilai, ere va ave oropa ve ekaopakilai. Ere va ore leivahaeakilai, ara ero ikivere leivahaeape.

¹⁰ Ara va kakare leipe la oharo a va kiva leipe, laelave ara kara meahaiapo maeamaea koaraki la amuraeaki hoa ara aro avara va ka. La amuraeaki hoa meahaiapo apealula haela oaria heheavakilai.

¹¹ Ara va elavelave ekekilai — A avape eharu mai aheke paeakive — ave heaorapaki korona haela hareavaki ave.

¹² Heaorapaki haela ara va arero Aualari ve Hehe Uvi ureve ve Ive leikilai; are aireaki hoau va ka: ara areve maea ve arave Aualari ve rare harilai, kai arave Aualari ve karikara ve rare kara. Jerusalem are, arave Aualari ve kaia ve kihoaukilai: arave rare āre kara.

¹³ Avako ila haela oaria, Ove ekalesia oaria maeaevila la oharo iapaila.

Laodicea Ekalesia paraeape hohoa

¹⁴ Laodicea ekalesia ve aneru ve hohoa maria paraeaki, Amene hovea la Amua ve oharo ma — are va vavavaki Amua, aheke i o iele ila, Aualari karikipe eharu oaria ve ipopeavape eharu:

¹⁵ Ara eve horova ore: e va vevehere ka, eva ahea va ka. Ara va ikivere e va vevehere iele leikive, aka ahea iele leikive.

¹⁶ Laelave, ehovea e va ahea i vevehere ila hoa haroapo, haiapo ka, ara ero mu hovea arave ape ve kaitavakilai.

¹⁷ Ehovea eve oharo maria, Ara va erohoho haela, eharu oaria ila, ara va ikivere eharu aea karia. A va haveva, ava o iele maea hovea ka, heaha hiki, merava kai ovohae kariri, kai maheare ila.

¹⁸ Ara ero maeaeaive — Arave maia a ureve aheke leipe gold ilaea leikive heroe, ehovea erohoho iele leikive: pura houhuka kara, ehovea eve maheare hoa karia leikive — ovohae muramura kapare kara, ehovea ovohae kohelaukakive.

¹⁹ Ara va ikivere iele leiki la haela ara erereakilai, kai o aheke maeakilai. Laelave iki auhohi kelavaila, iki helarivahaeaki.

²⁰ Eavaila, ara okiape mahokaea ve au peave — kai okiape kokoaeave. Haela ae arave āra la iapakilava, kai okiape la hapakilava, ara areve ureve araeakilai; ara are i hoa haroapo eapai larilai.

²¹ Heaha heaorapaki la haela ara va ara i hoa haroapo terona akea ve haiavakive avarakilai. Hoveahovea ara kara heaorapape — kai arave Oa i hoa haroapo terona akea ve haiavape.

²² Avako ila la haela, Ove ekalesia oaria maeaeaki la oharo iapaila.