Apokalupto 22 - Pupu Oharo Āre 1963 Genese 1970 Rute 1972

¹ Are araro ovokake ma ila la mai eapapo amoeape, alalaka iele. La ma Aualari i Mamoe Akore ila ve terona ve leia kihorerape.

² Areve okiharo hihi ve, mai ukai ukai ve, ovokake kora peape: areve hae ve hiru 12 ila, areve la hae hovare leivahaeape papare haroapoharoapo. La kora ve kolo kara vila‐ipipi oaria ve lei makukuriki kolo.

³ Aireaki heaha eharu karia: aka Aualari i Mamoe Akore ila ve terona leia aeakilai — areve horova haela areve horova leivahaeakilai.

⁴ Ere areve oropape eavakilai: Areve rare ereve hevere harilai.

⁵ Leia va oroa karia, ereve lamepa i hare ve ovava ila ikivere leivahaea va ka; ehovea Amua Aualari erero ovava avarakilai; ere va Amua hovea leivahaeakilai, aiai karia lei va ka.

Kokaukaki Oharo

⁶ Are araro kimaeape, Ma oharo va ehoe i iele ila. Hehe peroveta haela ve Amua Aualari areve aneru paraeape ehovea aireaki leivahaeaki horova oaria areve horova haela amoeakilai.

⁷ Eavaila — Ara elavelave ekekilai. Ma buka ve peroveta oharo kiva veveke leiki la haela iki veveke leikilai.

⁸ Ara, John, ma eharu eavavahaeape kai iapavahaeape. Ara iapape kai eavape la hoa, ara ma eharu amoeape aneru ve loa ipi ve ekaopi morapaeape.

⁹ Are araro mari maeape, Araro kamorapaealue. Ara ave horova haela kake, ave peroveta apavara ve horova kake kara; ma buka ve oharo kiva leilula la haela kara — Aualari morapaeaki.

¹⁰ Are araro kimaeape, Ma buka ve peroveta oharo kokakaukaelue — Hoa havahu ma.

¹¹ Haeae haela aeka haeae leiki; mai hirihiri la haela, aeka hirihiri leiki — Ehoe leiki haela, aeka ehoe leiki; hehe leiki haela, aeka hehe leikive.

¹² Iapaila — ara elavelave kihorerakilai. Kavale eharu hovea ara avikihorerakilai; haela oaria ve horova hoveahovea kavale leivahaeakilai.

¹³ Ara va Alpha i Omega ila, avare koare eharu i karia leiki eharu kara.

¹⁴ Areve pupu iapai kiva leivahaelula la haela ikiveveke kara leivahaeakilai, ehovea ovokake kora ve iele ereve eharu: ere va okiape havahu leia ve karikara pekahavakilai.

¹⁵ Ehovea mahokaea va avita, kai harea haela, kai airi pavora mai leilula haela, kai haela haeaki haela, kai hohao harihu momorapulula haela, kai opore mai ikivere leilula haela.

¹⁶ Ara, Iesu, Ara arave aneru paraeape ehovea ma eharu ekalesia oaria oropa ve iroro avahaeakive. Ara va David ve meamari: Ara va opovila kou ovava eapapo iele.

¹⁷ Ove i vila maepaki mari ila ve oharo maria, Ekeila. Ma oharo iapaki haela kara maeaki, Ekeila. Ma karave koa la haela ekekive, heroe. Ikivere haela oaria ovokake ma larive heroe, naoae, kavale karia.

¹⁸ Ehovea ara va ma buka ve peroveta oharo iapavahaeaki haela oaria ve oropa ve vavavakilai. Haela ae ma buka ve oharo oharo aeva la koperereakilava, ma buka ureve haeape la maea heaha oaria v'ila Aualari areve maea la koakilai.

¹⁹ Haela ae ma buka ve peroveta oharo uku la hareavakilava — Aualari Ovokake Buka ureve la haela ve uku la hareavakilai, Hehe Karikara ve kara, kai ma buka ureve haeape la eharu oaria kara.

²⁰ Ma oharo vavavaki haela ve oharo maria, O iele, ara elavelave ekekilai, Amene. O iele, Amua Iesu, ekela.

²¹ E oaria Iesu Keriso ve ikiheroe meru avaki. Amene.