Apokalupto 21 - Pupu Oharo Āre 1963 Genese 1970 Rute 1972

Kaia Are i Meahaiapo Are ila

¹ Ara kaia are i meahaiapo are ila eavape. Ehovea oropa la kaia i meahaiapo ila karia leilai: Ahea ma kara karia leilai.

² Ara, John, hehe karikara Jerusalem Are, Aualari Kela ve leia ve kihoauvila eavape. Are va vila maepaki mari ve maupa veveke ila hovea.

³ Ara Kaia ve āra eapapo iapape maria, Eavaila, Aualari ve apeaki uvi haela ve le aeave — Are ere i hareho apeakilai — Ere Areve haela leivahaeakilai: Aualari havahu ere i hoa haroapo aeakilai: Are ereve Aualari leikilai.

⁴ Aualari ereve ovohae ve o ma haroroakilai — aireaki haela i apihaeaki hoa karia, ikikakare karia, hi karia, kakare oaria kara karia leivahaeakilai; Ehovea oropa hoa ve eharu karia leilai.

⁵ Terona akea ve haiavape la Amua mariape, Eavaila — eharu oaria ara āre karikikilai. Are araro kimaeape, Hohoa haeaki, ehovea ma oharo ve iele i ehoe ila.

⁶ Are araro kimaeape, Kahara — Ara va Alpha i Omega ila; oropa eharu kai aireaki karia leiki eharu.

⁷ Ma karave koa la haela, ara va ovokake ma mekakure naoae naoae avarakilai.

⁸ Aka oaoka haela, kai ikikelavaki aue haela, kai haela heaha, kai haela haeaki haela, kai airi pavora ikivere leilula haela, kai harea haela, kai hohao harihu momorapulula haela, kai opore haela, ere va a i sulphur ila la ma haru eapapo herehere aeakilai, la va aireaki apaki hoa.

Kaia ve la Jerusalem

⁹ Maea heaha 7 ila haita 7 ila paparaehaupe la aneru 7 ila ve aneru ae araro kai ekepe — are ara i oharo hukavape maria, Ekela — Vila maepaki mari, Mamoe Akore ve uva, ara aro amoeakilai.

¹⁰ Are araro ove ureve eapapo i akea iele la kela lai pekape — Are la karikara eapapo, hehe Jerusalem, Aualari ve kaia ve leia kihoauvila araro amoeape.

¹¹ Are Aualari ve haharika eapapo ila, areve ovava kavale eapapo have ve ovava hoveahovea leipe, aitave hae alalaka iele hoveahovea.

¹² Areve āra eapapo i akea iele. Areve okiape twelve ila, la va kiva leivahaeape aneru kara 12 ila. Okiape akea ve haeape rare va 12 ila, la va Israel Haela ve hiru 12 ila ve rare.

¹³ Kauri ukai va okiape ilehoila — paipai ukai va okiape ilehoila, diho hoa ve ukai ve okiape ilehoila, hurava ukai kara okiape ilehoila.

¹⁴ Karikara ve haua va ipi 12 ila, ereve ureve Mamoe Akore ve aposetolo haela 12 ila ve rare haeape.

¹⁵ Ara i oharo hukavape la aneru karikara ve ihova leikive gold haru paeape, okiape haua ila kara.

¹⁶ Karikara ve ukai hari ila — areve heaikiapo areve huraha hoveahovea. Are karikara haru ila ihova leipe — 1,500 miles areve heakiapo i huraha i akea ve hoveahovea.

¹⁷ Are haua ve ihova kara leipe, 72 yards, haela ve ihova leiki mai hovea, la aneru kara ihova laria leipe.

¹⁸ Haua ve maea hovea maupa eapapo have ila; karikara va gold iele, ma ve alalaka hoveahovea.

¹⁹ Haua ve ipi ve kavale eapapo have oaria ila maupa leipe. Oropa ihau ve maupa va Jasper ila, ihau orahokaila va sapphire, ihau ilehoila va Chalcedon, ihau hari ila va emerald.

²⁰ Ihau hue ila va Sardonyx, ihau aukava ila va Sardius, ihau parae ila va Chrysolite, ihau ari ila va Beryl, ihau kae ila va Topaz, ihau horo ila va Chrysoprase, ihau karave ila va Jacinth, ihau avako ila va Amethyst.

²¹ Okiape 12 ila va aitave hae 12 ila. Okiape haroapo hovea aitave hae haroapo. Karikara ve okiharo va Gold havahu, ma alalaka iele hovea.

²² Ara areve leia Hehe Uvi au eavaila, ehovea Amua Aualari Akea Iele i Mamoe Akore ila va areve Hehe Uvi iele.

²³ La karikara hare ovava i papare ve ovava ila ikivere au leila: ehovea Aualari ve haharika iele areve ovava leipe, kai Mamoe Akore kara arero ovava avarape.

²⁴ Leia ovokake leivahaeape la vila‐ipipi oaria areve ureve loa loakilai — meahaiapo ve amua oaria ereve aheke i ahea ila areve leia aikevahaeakilai.

²⁵ Hare hoa areve okiape oaria kokaukavahaea va ka. ehovea oroa hoa leia horera va ka.

²⁶ Ere va vila‐ipipi oaria ve haharika i aheke ila leia aikekilai.

²⁷ Hirihiri leivahaeaki eharu, kai heaha eharu, kai opopoe eharu oaria leia arahava va ka. Mamoe Akore ve ovokake buka ve rare haeape la haela hiki.