Apokalupto 2 - Pupu Oharo Āre 1963 Genese 1970 Rute 1972

Ephesus Ekalesia paraeape hohoa

¹ A va Ephesus ekalesia ve la aneru ve hohoa maria haeaki, Kou 7 ila mai ore paeavila, kai lamepa ve maupa veveke ila avikaki eharu 7 ila ve aru hihi ve aula‐kelari la haela ve oharo ma.

² E leilula horova i heraho i aheke ila ara v'ore; ara v'ore e haela heahaha oaria ikihairihairi leilula: e va Aposetolo rare opore rareape la haela heheavape; ereve opore e v'ore leivahaeape.

³ E va heraho oaria hahaure au leila, ehovea arave harihari: E va ikihairihairi i mahuka ila au leivahaeaila.

⁴ Aka arave ikikekela eve haeae haroapo ma: e va oropa araro ikivere eapapo leivahaeape; ma hoa ka perehekai.

⁵ Iki auhohi kelavaki, e va hihilaupe la maea ve. Elavelave iki helarivahaeaki; oropa hoa ve la horova hovea, ma hoa leivahaeaki, eve lamepa ve avikaki eharu ara kihoai hareavaki ave. Iki helarivahaeaki.

⁶ Aka eve veveke haroapo ma: E va Nicolaitanes haela ve horova ikihairihairi leilula: ara kara erero ikihairihairi leivila.

⁷ Avako ila la haela, Ove Veveke ekalesia haela kileavahaeavila la oharo iapaila. Veveke leivahaeaki la haela ara va ovokake kola ve hae avarakilai, ehovea larive — la kola Aualari ve ita veveke aeavila.

Smyrna Ekalesia paraeape hohoa

⁸ Smyrna Ekalesia ve aneru ma hohoa paraeaki, Ma va oropa kai aireaki hoa ve Amua ve oharo ma; api kai uroupe la Amua.

⁹ Eve heraho ara v'ore, eve merava apeaki maea kara; aka e va erohoho haela hovea; ero rare heaha aiarape la haela ve opore oharo maria ere va Jew haela, ere Jew haela va ka, ere va Satan ve synagogue.

¹⁰ Aireaki koaraki la kakare oaoka kalaivahaelue. Iapaila, diabolo eve uku haela uvi muru paparaehakilai, eve heheavaki hoa la. E va hare 10 hovea heraho eapapo koarakilai: eve ikikekela aheke lei lei apaki hoa hovea — ara ero ovokake ve Korona avarakilai.

¹¹ Avako ila la haela, Ove Veveke ekalesia haela oaria maeaeaki la oharo iapaila: Heaha heaorapaki la haela are va aireaki apaki hoa heaha lei va ka.

Pergamum Ekalesia paraeape hohoa

¹² Pergamum ekalesia ve la aneru hohoa maria haeaki, Lelao mare ila la Amua ve oharo maria, Ave aeaki ita ara v'ore. Satan ve haiavaki ita kara leia.

¹³ Aka ave ikikekela aheke leivila, a va ikikekela v'ila hehepo au leila. O iele, a va ara v'ila kakare koarape; Antipas ara v'ila apape la hoa kara.

¹⁴ Aka arave ikikekela eve hahaeae uku mae, ehovea ave leia Balaam ve oki ikivere leilula haela — Balaam Balak Israel ve meavohula haela ve hereavaki okiharo kileape, maria, harihu eharu ve la hehe eapai larive, kai airi pavora mai kara.

¹⁵ Aeka eve leia apealula uku haela va Nikolaitanes haela ve kilea oharo ikivere leilula, ara va ikihairihairi eapapo leivila la oharo.

¹⁶ Iki helarivahaeaki, ara eve leia elavelave kihoauki ave, kai arave ape ve la lelao mare erero hahari leiki ave.

¹⁷ Avako ila la haela, Ove Veveke ekalesia maeaivila la oharo iapaila: Heaha heaorapaki la haela ara va pupu ila la manna avarakilai. La manna avaki haela hiki areve have houhuka ara urapakilai: la have ve rare are hiki ore leikilai.

Thyatira Ekalesia paraeape hohoa

¹⁸ Thyatira ekalesia ve la aneru maria oharo paraeaki, Ma va Aualari ve Akore ve oharo: areve ovohae va a uru hovea, areve loa va ario maupa hovea.

¹⁹ Ave horova, ave ikiheroe mai, ave ikikekela, ave kiva leiki horova veveke, ave auhohi aeaki mai, ara v'ore. Ara v'ore, oropa hoa a horova perehekai mahuka, kai ma hoa horova aheke iele leivila.

²⁰ Aka, arave ikikekela ave haeae ma: A va uamari Jezebel avaka va ka: are va opore rare peroveta rare ape — areve kilea oharo v'ila arave horova haela kari auvahaevila, laelave ere va airi pavora mai i harihu avarape la eapai laralula.

²¹ Ara arero ikihelarikive hare uku avarape, aka are va aheke iele, are iki helari va ka.

²² Ara aro maeaive: Are va maea heaha koarakilai: are i hareho mai heaha leilula la haela kara kakare eapapo leivahaeakilai, ehovea ereve mai areve la heaha hoveahovea.

²³ Areve akoremari kara o iele apihaeakilai. Ekalesia oaria ore leivahaeakilai, ara va haela ve iki ureve haropavila Amua. Ara va haela oaria horova ve kavale hoveahovea leivahaeakilai.

²⁴ Aka, e va Thyatira apealula haela aea, ma kilea oharo iapaki aue haela, ipi havahu la eharu ore au leila la haela (Satan ve la ipi iele hovea) ara ero mehau aeva avara va ka.

²⁵ E overa aeape la eharu veveke kiva auhohi leivahaeakive aiai ara eve leia pekakilai.

²⁶ Aeva heaorapaki haela, arave pupu kiva haiapo leiki la haela, are va vila‐ipipi oaria ve akea ve leikilai.

²⁷ Are ereve mamoe kiva haela leikilai; areve kiva leiki mai aheke iele leikilai — Hoveahovea elaa karikiki haela ve eharu va koekakilai — areve aheke, ara Oa ve avape la aheke hovea hovea leikilai.

²⁸ Ara arero opovila la kou avarakilai.

²⁹ Avako ila haela oaria, Ove Veveke ekalesia oaria maeaevila la oharo iapaila!