Apokalupto 19 - Pupu Oharo Āre 1963 Genese 1970 Rute 1972

Kaia ve la Veveke. Mamoe Akore ve uva maepaki ihova

¹ Ma eharu karia leilai, ara kaia akea ve haela oaria ve aramito eapapo iapape maria, Alleluia, ovokake, elaviilave Amua Aualari aheke i morapaeaki oharo aiaraki.

² Areve heheavaki mai va o iele i ehoe iele ila. Are va harari uamari eapapo heheavape, areve mai heaha v'ila meahaiapo lei heaha leipe la uamari. La uamari ve mai ve hakaitapape horova haela oaria ve la apu Are arero kavale hovea leipe.

³ Ere aeka maeaeape, Alleluia: areve la mahuvu pekai aiai karia lei va ka.

⁴ Haela hoaha 24 i aeha animala ila hari ila, terona akea ve haiavape Aualari momorapupe maria, Amen, Alleluia.

⁵ Terona ve leia āra kihorerape maria, Areve horova haela oaria, Arero oaoka leilula haela oaria, titaeka i ehoaha ila, hoa haroapo, elaviilave Aualari momorapuki.

⁶ Ara haela oaria ve aramito hovea iapape, ma oaria ve uara hovea, kaia kukururu oaria hovea. Ereve oharo maria, Alleluia! Akea Iele Aualari amua hoveahovea leivila.

⁷ Elaviila ikiveveke leivahaeakilai, areve rare kai momorapuki, ehovea Mamoe Akore ve Uva laeaki hoa le kihorera — Areve uva kara hoveahovea le aeave.

⁸ Arero maea pura veveke hahakive maeape veveroro i houhuka ila, ehovea pura houhuka va hehe haela ve mai ehoe iele.

⁹ Are araro kimaeape, Hohoa harive: Mamoe Akore ve uva laeaki hurae ve itavavahaeape haela oaria lei mekaka leivahaeaki. Are araro kimaeape, Ma va Aualari ve oharo iele havahu.

¹⁰ Ara areve loa ipi ve ekaopape ehovea arero morapaeakive. Are araro kimaeape, Laria kalailue — ara ave horova haela kake — kai Aualari ve vavavaki oharo avape apavara ve haela ae — Aualari morapaeaki, ehovea Iesu ve vavavaki oharo va peroveta oharo ve ove iele.

Keriso Akea Iele morapaeaki oharo

¹¹ Ara Kaia hapai la ovohae eavape. Iapaila — horse houhuka leia, La horse akea ve haiavape haela ve rare va ikikekela ehoe i O iele haela. Are va mai ehoe v'ila heheavaki horova i mare horova ila leivila.

¹² Areve ovohae a uru hovea, areve haro korona oaria korape. Are v'ila hape la rare haela oaria ore au leila: Are hiki ore.

¹³ Areve maea hahape pura apu v'ila maupa leipe. Areve rare va Aualari ve oharo.

¹⁴ Kaia ve la mare haela oaria horse houhuka akea ve areve airekai auvahaeape. Ereve maea hahape pura veveke ile houhuka i veveroro ila.

¹⁵ Lelao mare areve ape ve kihorerave; are va la lelao mare ila vila‐ipipi oaria haeakilai, Are va erero auli haru ila aheke iele erero kiva leivahaeakive. Aualari ve la hihiri aheke iele ve vine hae huharaki eharu are va loa huharavila.

¹⁶ Areve maea pura i areve mauki ila akea ve rare hape, Akea haela ve Amua Haela, Amua oaria ve Amua.

Areve iri haela hai ka leivahaeaki hoa

¹⁷ Ara hare ve epavila aneru haroapo kai eavape: Are āre hai itavape kai kaia ve aula‐kelari ori oaria maeaeape, E oaria iki Aualari ve hurae eapapo ve korukaiavahaeaki:

¹⁸ Amua oaria ve aivau, kai hevehe kapena oaria ve aivau, kai haela aheke oaria ve aivau, kai horse oaria ve aivau, e herehere lalavahaeakilai. Ereve akea ve haiavaki haela kara, haela oaria ve aivau kara, au hahape haela i naoae loalula haela ila, titaeaka i ehoaha ila, la haela ve aivau kara.

¹⁹ Ara aeha eharu eavape. Meahaiapo ve amua oaria i ereve hevehe haela ila korukaiavahaeape, ehovea horse akea ve haiavape la haela i areve hevehe haela ila hoa haroapo hahari avahaeakive.

²⁰ Ere aeha eharu kaivape, areve oropa horova ehoaha leivahaeape la opore peroveta haela kara, aeha eharu ve ihova aeape haela, kai areve harihu momorapupe la haela kara, la haela au amuraeape la opore peroveta haela. Erealilara hoa haroapo kaili, a eapapo i sulphur ila ma haru eapapo koavape.

²¹ Kepea haela horse akea ve haiavape la haela areve ape ve kihorerape la lelao mare v'ila haeape. Ori oaria ereve aivau v'ila eharau huharavahaeape.