Apokalupto 18 - Pupu Oharo Āre 1963 Genese 1970 Rute 1972

Karikara Eapapo ve hilauki hoa

¹ Ma eharu karia leivahaeape la hoa ara va aneru aheke ila kihoauvila eavape. Areve haharika meahaiapo lei ovava leipe.

² Are āra hai eapapo itavape maria, Babylon Eapapo le hilaupe, iele hilaupe. Areva haelaharihu ve apeaki ita leipe, Ovehahu heaha oaria ve ita, Ori oaria heaha i hirihiri ila ve kokaukaki ita.

³ Ehovea vila‐ipipi oaria areve mai heaha ve hihiri wine le lakarape. Meahaiapo ve amua oaria are i hareho mai heaha leivahaeape. Meahaiapo ve kakavae leilula haela oaria areve haeae oaria v'ila erohoho leivahaeape.

⁴ Ara kaia ve āra aea iapape maria, Arave haela e, areve leia ve kihoahukaila, E va areve heaha avaki ave, Areve la kavale heaha avaki ave.

⁵ Ehovea areve mai haeae oaria kaia ve pekahavape — Aualari areve heaha oaria ikikekelape,

⁶ Are ero kavale leivahaeape hovea, arero kavale leiki. Hoa orahokaila hovea arero kavale leiki — Areve kavale hekako hoa orahokaila heloekoakive.

⁷ Are va elare rare lei morapaeape. Are va mai Heaha oaria leivahaeape. Lahovea arero heraho i ikikakare ila kavale avaraki. Ehovea are elare iki ureve mari kekelape — Ara va Uamari Amua, Ara uva maitava lei va ka, ara ikikakare koara va ka.

⁸ Laelave areve maea heaha hare haroapo kihoreakilai: Apaki hoa, hivavara hoa, eroa hoa. Ere arero hoa haroapo a harilai, Ehovea arero heheavaki Amua Aualari va aheke iele.

⁹ Are i hoa haroapo airi pavora mai leivahaeape kai mai heaha oaria leivahaeape la meahaiapo amua are v'ila hivavara avahaeakilai; ere va arero ikihuru leivahaeakilai, ere areve a ve la mahuvu pekavila eavaki hoa.

¹⁰ Ere va areve la kakare oaoka leivahaeai, arai ve epavi maria avahaeakilai, Ikihuru, ikihuru Babylon Eapapo e, Karikara aheke e, Ehovea hoa haroapo ave heheavaki hoa le kihorera.

¹¹ Meahaiapo ilaea leilula haela kara are v'ila hivavara avahaeakilai, ehovea haela oaria la hoa ereve eharu ilaea leiki hoa karia leikilai.

¹² Ereve la eharu va — gold, kavale eapapo have, aitave hae, pura houhuka mekaka, pura ovoka, pura mahuka veveke, maupa pura oaria, kora mekakure, elephant keo karikipe haita, kora veveke karikipe haita kara, brass, kai auri, kai have karikipe eharu oaria.

¹³ Spices, muo veveke eharu, la‐apu veveke, muo veveke kora ila, wine, oil, flour veveke, wheat, boromakau, mamoe, horse i chariot ila, horova haela, kai haela ve ove kara.

¹⁴ Ave ove ikivere leivahaeape kora hae oaria karia leilai, Erohoho eharu mekaka iele le titavape. Ava aireaki erero koara va ka, karia iele.

¹⁵ Ma eharu ilaea leiroape haela, are v'ila erohoho leivahaeape haela, areve kakare oaoka leivahaeai arai ve epavavahaeakilai. Ere va hivavara eapapo avahaeakilai.

¹⁶ Ere maria maeaeakilai, Ikihuru, ikihuru iele, Karikara aheke iele, Pura houhuka kai pura ovoka, kai pura maupa veveke ila hahape la karikara, Auro, kai have mekaka kai aitave hae hahape la karikara.

¹⁷ Hoa haroapo erohoho eharu oaria karia leilai. Vevaea kapena, vevaea hahi haela oaria, kai vevaea horova haela, ahea ma ve aula‐kelari haela oaria, arai ve epavavahaeape.

¹⁸ Ere arero a hape la mahuvu eavape la hoa ere mariape, Lela karikara ma karikara eapapo hoveahovea leikilai ha?

¹⁹ Ere elare haro kekele mahuvu koavape kai hivavara avahaeape maria, Ikihuru, ikihuru iele. Karikara aheke iele, Vevaea haela oaria are v'ila erohoho oaria koaravahaeape la karikara. Hoa haroapo are va hauaka le leipe.

²⁰ Kaia ve apealula hehe aposetolo haela i peroveta haela ila, ikiveveke leivahaeaila, ehovea Aualari eve la kakare ve kavale arero avarape.

²¹ Aneru haroapo have haroapo, wheat hae haipepekaki have hovea, kaivi ahea ma koape. Are mariape, Laria, kakare eapapo ila, Babylon Karikara eapapo heaha leikilai, are va aireaki karia havahu leikilai.

²² Auli hivi haela kai hivi helaki haela, kai meovo hohoaki haela, kai puva hohoaki haela kara, ave leia, ereve hivi hela va ka. Horova haela oaria, horova lahua lahua haela oaria ve hoa ave leia karia leikilai. Ave leia wheat hae haipepekaki have ve hi aireaki e va ka, karia karia iele.

²³ Lamepa ve ovava ave leia heaoapa va ka. Uva laeaki haela, kai vila maepaki la uamari ave leia oharo avahaea va ka. Ehovea ave ilaea leiroape haela va meahaiapo oropa haela. Ave harihu horova vila‐ipipi oaria au amuraeape.

²⁴ Areve leia peroveta haela, kai hehe haela, kai meahaiapo ureve haeape la haela oaria ve apu ave leia koarape.