Apokalupto 17 - Pupu Oharo Āre 1963 Genese 1970 Rute 1972

Harari uamari i aeha eharu ila

¹ Haita 7 ila papaehaupe la aneru 7 ila ve aneru aea iki ara i oharo hukavape — are araro kimaeape, Ekela, ara ma oaria akea ve haiavavila la harari uamari ve heheavaki hoa amoeakilai.

² Meahaiapo amua oaria are ila airi pavora mai leivahaeape. Meahaiapo apealula haela oaria kara areve la airi pavora mai ve wine v'ila ihape leivahaeape.

³ Are araro Ove v'ila ita huakara lai aupe, ara aeha eharu ovoka akea ve haiavavila uamari eavape. La aeha eharu va o heaha rare oaria ila, areve haro 7 ila kai karaha 10 ila.

⁴ La uamari ve maea pura ovoka i maupa eapapo ila; areve la pura ve maupa va gold kai kavale eapapo have, kai aitave hae oaria; are gold hekako mai paeape: areve mai heaha i airi pavora oaria la hekako heloekoape.

⁵ Areve hevere rare haroapo hape maria, Muruhari eharu, Babylon eapapo, Harari uavila i Korea mai oaria ila ve Lou.

⁶ Ara la uamari eavape — are va ihape hovea, ehovea are va Iesu ve hehe haela oaria ila ve apu lape. Ara arero eavape la hoa ara va ikihorahora eapapo leipe.

⁷ Aneru araro kimaeape, A va horahora laleila ehovealeve ha? Are va la uamari ve muruhari oharo kileakilai, arero oraiavi auvila, haro 7 ila kai karahe 7 ila la aeha eharu.

⁸ Ara eavape la aeha eharu oropa aeape, kai ma hoa aea va ka; are kai ipi karia la karu kivikakilai, are kai havoavaki ita hoaukilai. Meahaiapo apealula haela oaria (meahaiapo avare koare ipopeavape la hoa ve buka ureve, rare au haeaila la haela) ikihorahora leivahaeakilai, ere aeape, aeaki aue kai aeakilai, la aeha eharu eavakilai.

⁹ Ma va ikiore haela ve ore leiki okiharo: haro 7 ila va kela ehoaha 7 ila, uamari haiavavila la kela.

¹⁰ Amua 7 ila kara, hue ila overa hihilaupe, haroapo aeavila, haroapo are kihorera va ka. Are va kihoreraki la hoa, are va perehekai aeakilai.

¹¹ Aeape kai aea va ka la aeha eharu, areva amua hari ila, are la Amua 7 ila hoa haroapo havoavaki ita hoaukilai.

¹² A eavape la karahe 10 ila, ere va amua 10 ila, ere va basileia au availa; ere va amua hovea aeha eharu i hareho haroapo hiki aheke ila, apeakilai.

¹³ Ereve ikikekela haroapo hiki. Ere va aheke i ahea ila aeha eharu aiarakilai.

¹⁴ Ma amua Mamoe Akore mare avahaeakilai, ehovea are va Amua oaria ve Amua, Akea Iele ve Amua. Are i hareho apeaki haela va au itavavavahaeape haela, ikivere leivahaeape haela, ikikekela aheke haela.

¹⁵ Are araro kimaeape, A eavape la ma oaria, harari uamari haiavavila la ma, ere va haela, kai haela maeokoko, kai vila‐ipipi oaria, kai uri oaria.

¹⁶ A va aeha eharu akea ve eavape la karahe 10 ila, ere va harari uamari ikiheaha leivahaeakilai; ere arero hararuakilai, kai lei maheare leikilai; ere va areve aivau larikilai, arero kai a veakilai.

¹⁷ Ehovea Aualari ereve iki heheloekoape, areve ikivere horova leikive, ereve basileia aeha eharu aiarakive, aiai Aualari ve Oharo o iele leivahaeakilai.

¹⁸ A eavape la uamari, are va meahaiapo ve amua oaria ve akea ve karikara eapapo.