Apokalupto 16 - Pupu Oharo Āre 1963 Genese 1970 Rute 1972

¹ Ara Hehe Uvi ve āra eapapo aneru 7 ila maeaeavila iapape, Elare oki auila — Aualari ve hihiri la haita meahaiapo ve hakaitapaki.

² Oropa aneru ai areve haita meahaiapo ve hakaitapape. La hoa, aeha eharu ve ihova ila la haela, kai arero momorapupe la haela, paila eapapo koarape.

³ Aneru aeva areve haita ahea ma ve hakaitapape, ahea ma va au apape haela ve apu hovea, ma ve la ovokake eharu oaria apihaeape.

⁴ Aneru aea areve haita mai ma ve i ma hoho v'ila hakaitapape; ere kara apu hovea leipe.

⁵ Ara ma ve aneru ve oharo maria iapape, Overa hoa, ma hoa, kai aireaki hoa ila ve Amua e, A va mai ehoe, ehovea a maria heheavape.

⁶ Ehovea ere va hehe haela i peroveta haela ve apu hakaitapape — A va erero apu avarape ehovea larive, ereva la kavale hovea.

⁷ Arura haha ve leia aneru aeve oharo are maria iapape: Kaire, Amua Aualari aheke iele, Ave heheavaki mai va o iele i ehoe hiki.

⁸ Aneru aeva areve haita hare akea ve hakaitapape — are va aheke avape ehovea haela oaria a ve haeakive.

⁹ Haela oaria a ahea iele haeape. Ere Aualari ve rare mai heaha ve Amua, o heaha avahaeape; ere heaha ve ikihuru au leila, ehovea Arero morapaeakive.

¹⁰ Aneru aeva areve haita aeha animala ve terona akea ve hakaitapape; areve basileia muruka le leipe, ere elare auli buravape, ehovea kakare eapapo.

¹¹ Ere kaia ve Aualari ve o heaha avahaeape, ehovea ereve kakare i paila ila oaria, kai ereve horova heaha ve ikihuru au leila.

¹² Aneru aeva areve haita Euphrates mai eapapo akea ve hakaitapape. Areve ma oaria haroropape, ehovea kauri ukai ve amua ve okiharo karikikive.

¹³ Ara ove heaha ilehoila, pariala hovea, kihorealula eavape, aeva hevehe eapapo ve ape ve, aeva aeha eharu ve ape ve, aeva opore peroveta ve ape ve.

¹⁴ Ehovea ere va horova ehoaha leilula haela‐harihu ve ove, ere ve meahaiapo amua oaria ve leia hoahukakilai, ehovea erero korukaiavahaeakive aiai akea iele Aualari ve la mare hare.

¹⁵ Iapaila: Ara korea haela hovea ekeve: kiva leiki haela, elare pura kiva leiki heroe, maheare leiki ave, kai haela oropa ve makiri leiki ave, la haela va lei veveke leikilai.

¹⁶ Are erero korukaiavahaeape ita va Hebrew uri ve rare Armageddon.

¹⁷ Aneru aeva areve haita va mea ve hakaitapape. Kaia ve Hehe Uvi ve, terona havahu leia ve kihorerape āra maria hape, Overa laleila.

¹⁸ Āra oaria, kai kaia kukururu, kai kevao oaria avahaeape: Mea puipui eapapo leipe kara: haela meahaiapo avare koare hoa apearoape hoa ikiki mahau, lahovea au laila, mea puipui eapapo havahu iele.

¹⁹ Karikara eapapo hoa ilehoila hamureape; vila?-?ipipi oaria ve karikara hihilaupe — Aualari Babylon eapapo kara ikikekelape, ehovea Areve hihiri eapapo ve wine hovea avarakive.

²⁰ Ahea ma ve la hiru oaria le titavape — kela ehoaha kara karia le leivahaeape.

²¹ Kaia ve lai, have titaeka hovea, haela oaria akea ve ihaupe; la have haroapo haroapo pound haroapo haroapo hoveahovea. Haela oaria Aualari ve o heaha avahaeape, ehovea have hovea la lai ve heaha, ehovea areve la heaha eapapo iele.