Apokalupto 14 - Pupu Oharo Āre 1963 Genese 1970 Rute 1972

Lamepa i lei ovokake leivahaeape haela ve ivahi

¹ Iapaila, ara Sion Kela ve Mamoe Akore haroapo epavila eavape; haela maeokoko, 144,000, areve Oa ve rare ereve hevere hape haela, are i hareho epavavahaeape.

² Ara kaia ve āra haroapo iapape, ma oaria ve uara hovea, kai kaia kukururu eapapo hovea. Ara auri hivi helavalula haela ve hivi kara iapape.

³ Ere va hivi are hovea terona oropa ve helavape, aeha eharu hari ila oropa ve kara, haela hoaha oropa ve kara. La hivi ore leivahaeaki haela ae va karia, meahaiapo ve lei ovokake leivahaeape la 144,000 haela hiki.

⁴ Ma va uavila au koaraila haela, ehovea ere va maea veveroro haela. Ere va Mamoe Akore ita oaria aula‐kelari hoa, areve airekai auvahaeaki haela. Ma va haela oaria ve au hareavape haela, ere va Aualari i Mamoe Akore ve oropa karape haela.

⁵ Ereve ape ureve oharo haeae karia; ere va Aualari ve Terona oropa ve heaha karia.

Aneru ilehoila ve la ivahi

⁶ Ara kaia ve hihi ve vivilavila aneru aea eavape: Are Oharo Veveke avape, ehovea meahaiapo apealula haela oaria, vila‐ipipi oaria, kai apavara oaria, kai uri lahua lahua oaria, kai hiru lahua lahua oaria, iroro oharo veveke arive.

⁷ Are āra eapapo hape maria, Aualari oaoka lei morapaeaki; ehovea areve heheavaki hare me kihorerave. Kaia i meahaiapo ila, ahea ma i mai ma oaria ila, karikivahaeape la Amua morapaeaki.

⁸ Aireaki aneru aea kara mariape, Babylon le hilaupe, la karikara eapapo le hilaupe, ehovea are vila‐ipipi oaria areve la mai haeae ve hihiri ma larive maeaeape.

⁹ Aireaki aneru aea kara āra hai itavape maria, Haela ae aeha eharu i areve harihu la morapaeakilava, kai hevere akea ve, aka mai ureve, ereve la ihova la avakilava,

¹⁰ La haela Aualari ve hihiri ve ma larilai: areve hihiri ve hekako kakaitakive ma ka au laila la wine. Hehe aneru i Mamoe Akore ve oropa ve, erero a i sulphur ila heaha eapapo leivahaeakilai.

¹¹ Ereve la heaha leiki mahuvu mea oaria pekavila. Ere hare i oroa ila iki paparaeha va ka. Aeha eharu i harihu ila momorapulula kai areve rare ve ihova aeakive la haela.

¹² Ma va hehe haela ve ikikekela aheke leivahaeaki hoa, ma va Aualari ve pupu i Iesu ve ikikekela mai kiva leivahaeaki haela ve hare.

¹³ Ara kaia ve āra iapape maria, Hohoa haeaki — aireaki Amua v'ila apihaeaki haela oaria lei mekaka leivahaeaki. Ove ve oharo maria, Kaire, ere va ereve horova v'ila iki paparaehakilai, ereve horova ereve airekai auvahaeakilai.

Hae hovare hoa i meahaiapo vine hae ikaeaki hoa

¹⁴ Iapaila, ara meuru houhuka eavape. La meuru akea ve haela ve Akore hovea haela ae haiavape. Areve haro gold korona korape. Are hoi mare mai paeape.

¹⁵ Aneru aea Hehe Uvi ve kihoaupe; are meuru akea ve la aneru āra hai maria itavape, Ave hoi mare ila haerapaki: ehovea haerapaki hoa ma: ehovea meahaiapo ve hae hovare hoa ma.

¹⁶ Meuru akea ve haiavape la aneru areve hoi mare meahaiapo le hoape, hae hovare le haerapape.

¹⁷ Aeka aneru aea kaia ve la hehe uvi ve kihaoupe — areve mai kara hoi mare ila.

¹⁸ Aeka aneru aea arura haha ve kihoaupe. Are va a ve aheke avape. Are hoi mare ila la aneru āra kai maria itavape Ave la hoi mare horova leiki: meahaiapo la vine hae oaria ikaeaki — ehovea vine hae oaria va hovare iele.

¹⁹ La aneru areve hoi mare ila meahaiapo huape. Are meahaiapo ve vine hae oaria Aualari ve hihiri ve vine huharaki ita ve le koavape.

²⁰ La vine huharaki ita karikara mahokaea ve loa huharavape. Apu huharaki ita ve le kihorerape aiai horse ve ape hahaki ela hoa, aiai mile 200 hovea.