Apokalupto 12 - Pupu Oharo Āre 1963 Genese 1970 Rute 1972

Uamari i ikihorahora leiki eharu ila

¹ Iki oaoka leiki eharu Kaia ve hihika leipe: Uamari ae ve maea hare kohahape hovea; papare areve loa ipi ve aeape, kai kou 12 ila hahape korona areve haro korape.

² Are ero‐ila leipe, are kai akore epakive la kakare ve hi eapapo iele ape.

³ Ikihorahora leiki eharu aeva kaia ve eavape: Hevehe heaha eapapo i ovoka ila, are haro 7 ila, kai haro karahe 10 ila. Areve haro ve korape amua ve korona 7 ila.

⁴ Areve aue kaia ve kou uku au hakeavi meahaiapo koavahaeape. Hevehe heaha ero‐ila la uamari oropa ve epavape, ehovea are va ikivere areve aire epaki la akore, epaki hoa elavelave larive.

⁵ Are akore hekai epape — La va aireaki vila‐ipipi oaria ve Amua aheke iele. Areve la akore ere Aualari ve leia lai pekape, areve terona akea ve leia.

⁶ La uamari huakara merava vivila Aualari are v'ila overa karikipe ita leia, ehovea are arero kiva leia leivahaeakilai, hare 1,260 hovea.

⁷ Kaia akea ve mare eapapo leipe; Michael i areve aneru oaria ila la hevehe heaha hahari avahaeape: Hevehe i areve aneru kara mare avahaeape.

⁸ Ere va au heaorapaila, laelave kaia akea ereve ita karia leilai.

⁹ Hevehe eapapo le avakape. La hevehe eapapo ve rare va haelaharihu: Satan kara, meahaiapo hoa haroapo amuraeape la aneru heaha. Arero kara meahaiapo huikapai paraeape, areve aneru kara are i hoa haroapo haruapape.

¹⁰ Ara kaia ve āra eapapo iapape maria, Ma hoa Ovokake kai Aheke, elaviilave Aualari ve basileia, areve Keriso ve aheke kara. Ehovea elaviilave apoheari au hahape la haela le avakape. Are Aualari ve oropa ve, hare i oroa ila are au hiki hahape.

¹¹ Ere arero heaorapape iele Mamoe Akore ve apu v'ila, ereve vavavaki oharo v'ila kara. Ere elare ovokake iki au kelavaila aiai apaki hoa kara.

¹² Laelave, kaia i leia apealula eharu oaria e, ikiveveke leivahaeaila! Meahaiapo i ahea ma ila apealula haela oaria e, ikihuru hela, ehovea diabolo eve leia lakihoaila, hihiri eapapo ila, ehovea are v'ore areve hare kepea oaria ka.

¹³ Arero meahaiapo huikapai paraeape la hoa, diabolo akore hekai epape la uamari hararuape.

¹⁴ Ere la uamari harapa eapapo ve maho orahokaila aiarape, ehovea are huakara merava vivilakive, are havahu ve ita leia, leia hoa aea, kai hoa ae ve hapu, ere arero ekaroa eapapo ve oropape v'ila areve eapai v'ila avarape.

¹⁵ Ekaroa eapapo areve ape ve, uamari ve aire ve, ma hakaitapape, mai eapapo hovea, ehovea are va ikivere la mai ma arero lai hoaukive.

¹⁶ Meahaiapo la uamari hukapape; meahaiapo areve ape ha la mai ma eapapo, Ekaroa eapapo hakaitapape la ma, le iropape.

¹⁷ Hevehe eapapo uamari hihiri eapapo leipe. Are ai uamari ve meavohula kepea oaria hahari avahaeape; Aualari ve pupu i Keriso ve iroro oharo kiva leilula la akoremari.