Apokalupto 11 - Pupu Oharo Āre 1963 Genese 1970 Rute 1972

Vavavaki haela orahokaila

¹ Ere araro hirivo avarape, ihova leiki haru hovea. Aneru urai mariape, Urou, Aualari ve Hehe Uvi kai arura haha kai leia ve ivaiva leivahaeaki haela oaria, ihova leikive.

² Aka Hehe Uvi mahokaea ve la āra hakurepa, kai ihova lei va ka. Leia ita lahua haela ve āra: ere va Hehe Karikara loa huharakilai papare 42.

³ Ara va arave vavavaki haela orahokaila aheke aiarakilai: Ere maea pute haro kohahai peroveta oharo avahaeakilai, hare 1,260.

⁴ Ma va olive kora orahokaila, kai meahaiapo ve Amua oropa ve epavaki la lamepa avikaki eharu.

⁵ Haela ae erealilara heaha la leikilava, a uru erealila ve ape ve kihorerakilai. Haela ae erealilara heaha la leikilava, are maria apakilai.

⁶ Erealila va aheke ehovea Kaia kokaukakive, laelave erealilave peroveta avahaeaki hare lai ihau va ka. Erealila ve aheke ehovea ma oaria apu hovea koelarikive, kai meahaiapo maea heaha v'ila hararuakive, erealila ve ikivere hoveahovea.

⁷ Erealilave oharo karia leiki la hoa, ipi karia karu ve kipe?-?kaki eharu heaha erealilara mare arilai: are erealilara heaorapai haeakilai.

⁸ Erealilave maea huru karikara eapapo ve okiharo naoae naoae apeakilai. La karikara ove v'ila ve rare va Sodom i Egypt ila, elaviilave Amua satauro akea hape la karikara.

⁹ Ita oaria, hiru lahua lahua oaria, uri lahua lahua oaria, vila‐ipipi oaria, ve haela, hare ilehoila kai kapu ila, erealila ve maea huru eavakilai. Ere va erealilave maea karu paraeaki ikivere leivahaea va ka.

¹⁰ Meahaiapo apealula la haela ere v'ila ikiveveke leivahaeakilai kai e irihikilai. Ere va elarelare meru paparaehakilai, ehovea ma peroveta haela orahokaila meahaiapo haela hararuape.

¹¹ Hare ilehoila kai hapu karia leiki la hoa, Aualari ve ovokake ove erealilave maea kai araeape, erealila elare loa urai pavape, erealilara eavavahaeape haela oaria oaoka eapapo leivahaeape.

¹² Erealila Kaia ve āra eapapo iapape maria, Kivikavahavaila. Erealila meuru ureve kaia akea ve pekahavape. Erealila ve iri haela erealilara eavavahaeape.

¹³ La hoa havahu mea puipui eapapo leipe, karikara ve uku le hilaupe, mea puipui hoa haela 7,000 apihaeape. Kepea haela oaoka leivahaeai kaia ve Oa morapaeape.

¹⁴ Ikihuru orahokaila karia leilai. Iapaila: Ikihuru aeva kihoreraki va maia iele.

Puvas parae ila

¹⁵ Aneru aeva puva hohoape. Kaia ve āra ehoaha hihika maria avaheape, Ma meahaiapo ve basileia, elaviilave Amua ve basileia hoveahovea leivahaeape, areve Keriso ve kara. Are va Amua mea oaria leikilai, aiai karia lei va ka.

¹⁶ Aualari oropa ve avape la haela hoaha 24 oropape ekaopi Aualari momorapupe.

¹⁷ Maria: A va overa hoa, kai aireaki hoa, au hiki aeavila Amua Aualari akea iele. Ela va aro thank you eapapo aro, Ehovea ava aheke iele avi, Amua iele le leipe.

¹⁸ Vila‐ipipi hihiri leivahaeape: Ave hihiri le kihorera: Au apihaeape haela ve heheavaki hoa kara le kihorera. Ave horova i peroveta ila haela, Kai hehe haela, kai Ave Rare oaoka leilula haela, Titaeka i ehoaha ila ve kavale veveke avaraki hoa kara. Meahaiapo heaha leilula la haela ve hai ka leivahaeaki hoa kara.

¹⁹ Aualari ve Hehe Uvi kaia akea ve hapape. Haela areve okoare ve arura maua hehe uvi ureve eavavahaeape. Kevao oaria kai āra oaria, kai kaia kukururu oaria, kai mea puipui, kai lai aheke ila leivahaeape.