Apokalupto 10 - Pupu Oharo Āre 1963 Genese 1970 Rute 1972

Aneru aheke i buka hekai ila

¹ Ara va kaia ve kihoauvila aneru aheke haroapo eavape: areve maea meuru aerape; areve haro biae korape, areve oropape hare hovea, areve loa a uru ehoaha hovea.

² Are va au hapape buka hekai mai paeape. Are va loa ore ukai ahea ma epavape, areve loa keva ukai va meahaiapo epavape.

³ Are āra hai eapapo itavape, lion ve āra eapapo hovea. Are hi ape la hoa kaia kukururu hoa 7 ila avahaeape.

⁴ Kaia kukururu 7 ila karia leipe la hoa, ara iki oharo haeakive. Ara Kaia kihoreraki āra haroapo iapape maria, Kaia kukururu 7 ila avahaeape la eharu kokaukakive, erero kahaealue.

⁵ Ara ahea ma i meahaiapo ila epavila eavape la aneru elare mai ukai ve urapape.

⁶ Mea oaria aeavila la Amua, kaia i areve eharu oaria ila, meahaiapo i eharu oaria ila, ahea ma i areve ureve eharu oaria ila, karikivahaeape la Amua ve rare v'ila — la aneru okoare ape maria: Aireaki hoa karia.

⁷ Aka aneru 7 ila oharo arilai, are āra hai ipopeavaki hoa, Aualari ve muruhari eharu hihika leikilai, Are peroveta haela overa kileape la oharo hoveahovea.

⁸ Ara kaia ve iapape la āra araro aeka kimaeape, Aula, ahea ma i meahaiapo ila akea ve epavila la aneru ve mai paeavila la buka hekai hareavaki.

⁹ Ara aneru leia hoai maria maeape, Buka hekai hela araro avikiara. Are kavale maeape, Ai — larive: are ave eharau kaeake leikilai, aka ave ape ureve leia are va hirore leikilai, avare hovea.

¹⁰ Ara buka hekai aneru ve mai ve hareavi le lape. Are arave ape ureve hirore leipe, avare hovea. Aka, ara lape la hoa, arave eharau ureve kaeake le leipe.

¹¹ Are araro aeka kimaeape, A va vila‐ipipi oaria oropa ve peroveta oharo arilai, ita haela oaria kara, uri oaria kai amua haela oaria kara.