Apokalupto 1 - Pupu Oharo Āre 1963 Genese 1970 Rute 1972

Hapaki oharo. Ikiheroe oharo

¹ Aualari Iesu Keriso avarape la iki ureve oharo, ehovea aireaki kihoreavaki eharu areve horova haela kileavahaeakive. Are areve aneru paraeape; areve horova haela John ma oharo hihika kileavahaeakive.

² Are Aualari ve Oharo Veveke kileavahaeape: Iesu Keriso ve vavavaki oharo kara: are kai ivahi ve eavavahaeape la eharu oaria kara.

³ Ma oharo mureaki hoa iapavahaeaki la haela lei veveke leikilai: ere va ma oharo iki auhohi kelavakive heroe. Hoa va maia iele.

⁴ John Asia ve la ekalesia 7 ila ma ikiheroe oharo paraeaive: Overa hoa, ma hoa, kai aireaki hoa aeavila la Amua ero ikiheroe meru i havila aiaraki: areve terona oropa ve la Ove 7 ila ve ikiheroe meru kara.

⁵ Iesu Keriso va vavavaki haela iele, oropa api kai ovokake ila uroupe haela la — meahaiapo amua oaria ve akea ve amua. Are elaviilara ikiheheroe leivahaeape kai are havahu ve apu ve elaviilara mai heaha ve lei veveroro leivahaeape.

⁶ Are elaviilara Areve Oa Aualari ve amua i oharo haela haharika i aheke ila mea oaria aeakilai. Amene.

⁷ Iapaila: Are meuru ureve kihorerakilai: haela oaria arero ovohae eavakilai: o iele arero huru hape la haela kara — meahaiapo vila‐ipipi oaria kara are v'ila ikihuru leivahaeakilai. Amene.

⁸ Ara va Alpha kai Omega, avare koare hoa ikiki aireaki karia leiki hoa — overa aeape, ma hoa aeavila, kai aireaki aeakilai la Aualari iele.

Haela ve Akore ivahi

⁹ Ara, John, eve apoheari, ara e i hareho basileia ve heraho i Iesu ve aheke ila herehere leivila. Ere araro ma Patmos hiru kiparaeape, ehovea ara Aualari ve oharo ikivere leipe, kai Iesu Keriso ve oharo iele iroro ape.

¹⁰ Amua ve hare, Ove Veveke araro iki ureve kileape; areve āra eapapo, puva hovea hohoape maria.

¹¹ Ara va Alpha i Omega ila, oropa kai aireaki Amua iele. A va eavavahaeaki la eharu oaria buka haeaki. La buka Asia apealula la Ekalesia 7 ila paraeaki: Ephesus kai Smyrna kai Pergamos, kai Thyatira, kai Sardis, kai Philadelphia, kai Laodicea.

¹² Are au helaripe ehovea araro kimaeape la āra ovohae eavakive. La hoa ara va lamepa avikaki eharu, gold maupa ila, eavavahaeape.

¹³ Ereve la aru hihi ve haela ve Akore hovea haela epavape: areve maea hareho pura heaikiapo kohahape aiai loa hoa; areve arahu va gold ela hahape.

¹⁴ Areve haro i haro kolo ila va houhuka iele, mamoe kolo i snow hovea — areve ovohae va a uru hoveahovea.

¹⁵ Areve loa va brass mekakure, kemo a eapapo a hape brass iele la hovea; areve āra va ma oaria ve uara hoveahovea.

¹⁶ Areve mai ore ila kou 7 ila mai papaehaupe; areve ape ve poke mare iele kihorerape. Areve oropape va hare ve ovava eapapo hoveahovea, aheke iele.

¹⁷ Ara arero eavape la hoa ara areve loa ipi ve hilaupe, huru hovea. Are areve mai ore v'ila araro mai kohari maria maeape,

¹⁸ Oaoka kalailue — ara va oropa kai aireaki, mea oaria aeavila Amua: ara apape, ma hoa ara va ovokake aiai karia lei va ka. Hell i apihaeaki ita ve key arave me apearo.

¹⁹ A eavavahaeape la eharu oaria ve hohoa haeaki, ma hoa ve eharu kara, aireaki kihoreavaki la eharu kara.

²⁰ A arave mai ore ureve laeavila la kou 7 ila ve o iele, kai la lamepa avikaki eharu, gold maupa ila, ve o iele: kou 7 ila va ekalesia 7 ve aneru: a laeavila la lamepa avikaki eharu 7 ila va ekalesia 7.