3 John 1 - Pupu Oharo Āre 1963 Genese 1970 Rute 1972

¹ Gaius, arave ikivere kake iele, ara, Aualari ve oropa haela, ave hohoa perehekai hela mave haeairo.

² Kake e, ara va ikivere ave maea veveke hiki leikive, hoveahovea, ave ove ve ovokake kara.

³ Ehovea, apavara iki ave la mai veveke iele araro kileape la hoa, ara va ikiveveke eapapo leipe, ehovea a va mai iele kiva leivila.

⁴ Ara va ikiveveke aeva karia, maria hiki, arave akoremari o iele mai kiva hiki leikive.

⁵ Kake e, ave mai veveke ma — leia pekaki apavara auhohi leivahaeaki, kai ita lahua la hahi haela kara.

⁶ Ere ave la ikiheroe mai ekalesia haela oaria kileavahaeape: Ereve hahi hoa hela erero auhohi lei paparaehaki, Aualari ve ikiheroe mai hoveahovea.

⁷ Ere va Aualari ve rare v'ila hahi auvahaeape: ere kelavaki aue haela ve eharu ikivere au leila.

⁸ Laelave, veveke, elaviila kara erero auhohi leivahaeakive; laria elaviila o iele koaraki haela.

⁹ Ara ekalesia haela ve hohoa paraeape: Diotrephes hiki elave oharo au iapaila, ehovea areve ikikekela are Amua haela.

¹⁰ Laelave, arave leia pekaki hoa, ara va areve mai haeae ikikekelakilai, ehovea are elave rare o heaha maeaevila. Aeva are va oharo hiki ka, are apavara kara auhohi leivahaea va ka, aeva apavara auhohi leikive ikivere la haela are aihukamaeavila kai Ekalesia mahokaea ve haruapavila.

¹¹ Apavara, mai heaha ikivere kalaivahaelue; Mai veveke hiki kiva leivahaeaki. Mai veveke leiki haela va Aualari ve haela, aka mai heaha leivila haela are va Aualari au eavaila.

¹² Haela oaria Demetrius ve rare momorapulula — o iele kara, ara kara are v'ila vavavavila: e v'ore, arave oharo iele.

¹³ Ara va ikivere oharo oaria paraeakive, aka ara hohoa oaria haea va ka.

¹⁴ Ara va ikivere haiapo ka aro ovohae eavakive. La hoa elavaila oharo veveke hukavakilai.

¹⁵ A havila avaki. Apavara oaria aro ikiheroe oharo paraeaive. Arave kake haela oaria haroapo haroapo arave ikiheroe hela avaraki.