2 Timothy 4 - Pupu Oharo Āre 1963 Genese 1970 Rute 1972

¹ Aualari i Amua Iesu Keriso ila, ovokake i apihaeape haela oaria basileia kihoreraki hoa heheavakive la haela, oropa ve, ara aro ape karava maeaive —

² Iroro oharo arive, mea oaria la horova kiva auhohi leikive; aihukamaeaki, o iele kileakive, ape karava aheke iele ila oharo ehoe kileakive.

³ Ehovea aireaki hare aea, haela kileaki oharo ehoe hahaure leivahaeakilai. Ere ve ere havahu ve ikivere kilea haela ve oharo iapakilai, ere havahu ve ikivere oharo haeae.

⁴ Ere va o iele haure lei naoae naoae oharo hiki iapakilai.

⁵ A va kiva auhohi leiki, iki heraho kalailue, evanelia horova auhohi leikive, aro itavape la iele hihika vavavakive.

⁶ Arave horova hoa karia leikive maia iele; maea maea ara ero haitapakilai.

⁷ Ara va mare veveke ape: ara va hivove veveke vivilape: ara va ikikekela horova kiva auhohi leipe.

⁸ Aireaki arave mai ehoe ve kavale veveke ara avakilai. Amua, ehoe heheavaki la Amua, la Hare Iele araro avikiarakilai. Ara hiki ka: horova veveke leivahaeai arero karivahaeape haela oaria kara.

Ikiheroe i kokaukaki oharo ila

⁹ A va maea hovave arave maia ve elavelave kilaukive, heroe.

¹⁰ Ehovea Demas araro hakurepape: are va meahaiapo eharu ikivere leipe, kai Thessalonica aupe: Crescens Galatia aupe, Titus kai Dalmatia aupe.

¹¹ Luke hiki araro koarai aeavila. Mark hareavi, are a i hareho kilaukive heroe, ehovea are arave koaraki haela veveke.

¹² Tychicus are Ephesus paraeape.

¹³ Ara Troas, Carpus ve uvi ve hakurepape la maea pura, ave kilauki hoa hela avikilaukive, buka oaria kara, aeva arave ikivere iele arave la hohoa iilu.

¹⁴ Alexander, brass horova haela, araro mai heaha leipe: Amua areve horova hovea hovea kavale avarakilai.

¹⁵ A kara arero kiva auhohi leikive, ehovea are elave kileaki oharo ape hahari oaria ape.

¹⁶ Ere araro oropa hahape la hoa haela oaria arave ukaki au epavaila; haela oaria araro haure leipe. Ara Aualari ere v'ila ivaiva leive, Are leia ve erero hihiri lei v'arekaea.

¹⁷ Aka Amua araro iele koarape. Are araro lei aheke leipe, ehovea arave oki ve iroro oharo veveke haela oaria iapakilai, ita lahua haela kara ore leivahaeakilai. Are araro lion ve ape ve hareavape hoveahovea.

¹⁸ Amua araro horova heaha oaria ve lei makurikilai. Are araro kiva lei lei ara areve basileia mekakure iele eavakilai. areve rare mea oaria morapaeaki; Amene.

¹⁹ Prisca i Aquila ila arave ikiheroe avaraki: Onesiphorus i areve lalava haela ila kara.

²⁰ Erastus Corinth aeape. Trophimus ara Miletus hakurepape, ehovea are maea kakare koarape.

²¹ A va oropa kilaukive heroe, mea vevehere hoa aire. Eubulus aro ikiheroe oharo paraeaive: Pudens, Linus, Claudia i apavara oaria ila aro ikihuru leivahaeairo.

²² Amua Iesu Keriso ave ove i hareho aeaki. A ikiheroe meru avaki.