2 Timothy 3 - Pupu Oharo Āre 1963 Genese 1970 Rute 1972

Aireaki kihoreraki eharu heaha

¹ Ma oharo ore leiki — Aireaki hoa elaviila heraho eapapo leivahaeakilai.

² Ehovea haela uku elare maea hiki ikivere leivahaeakilai, eharu oaria ikivere leivahaeakilai, pelaea mai leivahaeakilai, o heaha avahaeakilai, oa i lou ila hahaure leivahaeakilai, kai ikiheaha i mai haeae ila leivahaeakilai.

³ Uku haela va ikiheroe iele karia, okoare haerapakilai, haela ve hahakive oharo opore avahaeakilai, mai haeae leivahaeakilai, aeha hiki leivahaeakilai, kai mai veveke ikihairihairi leivahaeakilai.

⁴ Ere va hehepo oaria leivahaeakilai, iki naoae naoae, kai pelaea iele leivahaeakilai. Ere va Aualari perehekai hiki ikivere leivahaeakilai, ere havahu maea ve eharu oaria ikivere eapapo leivahaeakilai.

⁵ Ereve ape oharo i oropape hiki veveke leivahaeakilai, aka iki ureve iele karia. Mahovea haela a koara v'arekaea.

⁶ Lahovea haela ere va haela ve uvi pekahavi iki haveva uavila au kurupaeakilai, ehovea mai heaha leivahaeakive. Ere va ikivere mai lahua lahua oaria.

⁷ Ere mea oaria ore leivahaelula, aka iele havahu ore leivahaea va ka.

⁸ Hovea hovea Jannes i Jambres ila Moses ila o hahari avahaeape, ma haela kara o iele hahari arula. Ereve ikikekela haeae, laelave iki ureve horova hovea ka.

⁹ Aka ere va aireaki aheke leivahaea va ka, ehovea ereve ikihaveva mai haela oaria oropa ve hihika leikilai, overa hoa ve la harea haela hovea hovea.

Timothy ve lei ovokake leiki eharu veveke

¹⁰ Arave kilea oharo, arave mai, arave ikivere okiharo, arave hahari hahari aeaki mai, arave ikiheroe mai, arave ikikekela, a ore overa leipe.

¹¹ Haela araro hararuape, arave heraho oaria koarape. A v'ore ara va Antioch i Iconium heraho eapapo leipe; aka Amua araro leia ve lei makuripe.

¹² O iele, Keriso Iesu ve okiharo veveke ikivere haela oaria heraho leivahaeakilai.

¹³ Mai heaha i opopoe haela oaria havahu leivahaeakilai, amuraeaki horova oaria leivahaeakilai.

¹⁴ A va ore leipe la okiharo kiva leiki: a v'ore leipe la horova oaria leivahaeaki. La eharu aro kileape la haela a v'ore.

¹⁵ Ave akore hekai hoa a buka oharo oaria ore leipe: ave ikikekela aheke la leikilava, la oharo veveke aro lei makurikilai, ehovea Iesu Keriso ve rare ve.

¹⁶ Buka oharo oaria Aualari ve Ove avarape; are va kileaki oharo veveke iele, ehovea haela oaria iki ehoe okiharo amoeakive.

¹⁷ Laria, Aualari ve haela mea oaria mai veveke hiki leivila, areve horova oaria kara mekaka hiki.