2 Timothy 2 - Pupu Oharo Āre 1963 Genese 1970 Rute 1972

Oharo hahari mai kalailue

¹ Arave akore e, Keriso Iesu ve ikiheroe meru v'ila aheke leiki.

² Aeva ara aro haela oaria oropa ve kileavahaeape la oharo oaria, ikikekela aheke haela kai kileavahaeaki, ehovea ere kara haela aeva kileavahaeakive.

³ A va Iesu Keriso ve hevehe haela hovea hovea leiki, heraho i kakare ila hoa aheke leiki.

⁴ Mare veveke avila haela are meahaiapo ve eharu hiki kelava va ka, ehovea are va ikivere arero mare horova ve itavape la haela ikiveveke leikive.

⁵ Aeka erau veveke, aka hivove vivilaki la haela, are erau ve mai veveke leiki aue la leikilava, are heaorapaki meru ava va ka.

⁶ Horova iele leipe la oru haela are oru ve eapai oropa larilai.

⁷ Arave oharo ikikekela — Aualari eharu oaria aro hihika kileakilai,

⁸ Iki alala: Iesu Keriso, David ve meamari, api kai uroupe, arave iroro oharo ve ipi la.

⁹ Laelave, ara kara heraho leivila: ere araro mai haeae haela hovea hovea muru uvi le hahape: aka Aualari ve oharo ere va hahakive hovea ka.

¹⁰ Laelave heraho oaria hoa ara aheke aeavila, ehovea Aualari ve ikivere haela Iesu Keriso ve la haharika i ovokake haiapo iele ila aeakive.

¹¹ Ma oharo va iele: Ela are i hareho la apihaeakilava, ela kai are i hareho ovokake iele leivahaeakilai.

¹² Elaviila are i hoa haroapo kakare la leivahaeakilava, elaviila are i hareho amua horova leivahaeakilai. Elaviila arero hahaure la leivahaeakilava, are kara elaviilara hahaure leivahaeakilai.

¹³ Elaviila iki kelavaki aue la leikilava, are iki ehoe ila aeakilai: are elare haure leikive hovea hovea va ka.

¹⁴ Ma oharo oaria erero aeka kileavahaeaki — Aualari oropa ve erero ahilaki — ere naoae naoae oharo hahari kavahaelue. Laria mai iapaki haela oaria iki horahora hiki leivahaeakilai,

¹⁵ A va Aualari ve oropa ve horova aheke leikive, a va horova haela veveke, makiri karia, o iele, Aualari ve o iele, veveke arive.

¹⁶ O heaha i ikihaveva naoae naoae oharo ila hahaure leikive; ehovea la okiharo ve haela Aualari ve rare kara naoae naoae leikilai.

¹⁷ Ereve lahovea oharo haela ve iki ureve haeae hiki leivahaeakilai, Hymenaeus i Philetus kara laria.

¹⁸ Ehovea erealila o iele haeae la kelavape, ehovea erealila ve oharo maria, ‘Api kai uroukive hoa overa karia le leipe.’ Ereve la oharo uku haela iapai mai veveke le hakurepape.

¹⁹ O iele, Aualari ve ipi iele aheke le aeave — areve ihova ma, Aualari are havahu ve haela ore — aeka ma, Aualari ve rare arula la haela oaria mai heaha hakurepa va heroe.

²⁰ Aka uvi eapapo ureve eharu oaria apearo — uku va auro i ario ila, uku va kora i kae ila, karikivahaeape. Uku va horova ehoaha leilula, uku horova titaeka hiki.

²¹ Laelave haela ma mai heaha hahaure la leikilava, are va horova eharu mekakure hovea, hehe iele, Oa ve horova eapapo leikive hovea hovea; kai horova mekaka oaria hovea hovea.

²² Harokou haela oaria ve mai hahaeae a ikivere kalailue. A va mai ehoe, iki ehoe, ikiheroe, kai havila ila la mai oaria ikivere leikive. Aualari ve horova ikivere haela oaria ka laria.

²³ Ikihaveva naoae velavela oharo kahukavalue, ehovea leia ve hahari heaha hiki kihorerakilai.

²⁴ Aualari ve horova haela iele hahari e va ka: A haela oaria ikiheheroe leikive, auhohi kileakive, kai ikiheaha elavelave kalailue.

²⁵ Aro ape hahari arive la haela hahari hahari ila kavale maeaeaki. Ela ore ka, Aualari ereve iki lei helarikilai, ere kai o iele okiharo ore leivahaeakilai:

²⁶ Ere va aeka iki ovava leivahaeakilai la, aeva Diabolo erero aireaki amuraea va ka. Ere va aireaki iki helari Aualari ve ikivere horova iele havahu leivahaeakilai.