2 Timothy 1 - Pupu Oharo Āre 1963 Genese 1970 Rute 1972

Ikiheroe i thank you oharo ila

¹ Ara, Paul, Keriso ve aposetolo haela leipe, ehovea Aualari ve ikivere, Iesu Keriso ve la ovokake ve okoare hoveahovea.

² Ara iki havahu akore, Timothy, ve hohoa ara mave paraeaive: Oa Aualari i Amua Iesu Keriso ve ikiheroe meru i ikihuru i havila ila a i hareho aeaki.

³ Ara Aualari ve horova mea oaria ikiveveroro ila leivila, uvari vilari leivahaeape hovea; laelave ara arero thank you oharo ave, ehovea ara mea oaria, oroa i hare ila, arave ivaiva hoa, aro kekelavila.

⁴ Ara ave o ma iki kekelavila, kai ara va ikivere eapapo aro ovohae eavakive, ehovea ikiveveke leikive.

⁵ Ara ave la ikikekela aheke ore, ave la uvari, Lois, kai ave la lou, Eunice kara, laelave ara va mea oaria ikiveveke leivila: ara v'ore a kara ikikekela aheke haela.

Iki aheke leiki oharo

⁶ Laelave, ara aro ape karava maeaive, aro mai koharape la hoa, Aualari aro meru veveke avarape: la meru horova auhohi leiki.

⁷ Ehovea Aualari elaviilaro iki oaoka leikive ove au avaraila, aka aheke i ikiheroe i iki ehoe ve la ove.

⁸ Laelave a va Aualari ve oharo hihika vavavakive, makiri kalailue: ara ka areve muru uvi aeavila haela; ara v'ila kara makiri kalailue. A va iroro veveke ve heraho herehere leiki, Aualari ve aheke ve okiharo ve.

⁹ Are elaviilara lei makukuripe: Are elaviilara hehe haela hovea itavape, ehovea elaviilave horova va ka, aka ehovea are havahu ve ikivere kai are havahu ve ikiheroe meru. Are la ikiheroe meru Keriso Iesu ve oki ve avarape, overa hoa, meahaiapo ve avare koare hoa va la.

¹⁰ La va ma hoa hihika leive, ehovea elaviilave lei makukuriki haela Iesu Keriso kihoaupe. Are apaki hoa le avakape. Are kai ovokake mekakure haiapo Iroro Veveke ve okiharo ve hihika le leipe.

¹¹ La iroro arive haela ae va ara ma. Ara va aposetolo haela, Ara va ita lahua haela ve kilea haela kara.

¹² Ehovea la ara ma hoa heraho leivila. Aka ara makiri lei va ka, ehovea ara ikikekelape la Amua ara v'ore — ara v'ore iele ara arero avarape arave la ove are kiva leivila aiai hita hare iele la.

¹³ Ara aro kileape la okiharo i oharo veveke ila a kiva auhohi leiki; Iesu Keriso ve ikiheroe ve iele la,

¹⁴ Aro avarape la eharu veveke, elaviilave iki ureve la Ove Veveke aro koarakilai,

¹⁵ A v'ore overa leipe — Asia apealula la haela oaria araro haure leipe; Phygellus i Hermogenes ila kara.

¹⁶ Amua Onesiphorus i areve lalava haela oaria ikiheheroe leikilai, ehovea hoa oaria are araro kai ikiheroe leipe: are araro hahape la auri horou ve makiri au leila;

¹⁷ Are Rome pekape la hoa are araro auhohi haropi koarape.

¹⁸ Amua aireaki la hare iele arero ikihuru leikilai. Ephesus leia kara are araro kiva auhohi leipe, a va leia ve ore overa leipe.