2 Peter 3 - Pupu Oharo Āre 1963 Genese 1970 Rute 1972

Keriso ve aireaki ekeki hare

¹ Ma aireaki hohoa, apavara, ara ero paraeaive. Ara va ikivere eve iki veveroro leivahaeai iki iele kelavakive.

² E va overa peroveta haela avahaeape la oharo iki kelavaki: Ela aposetolo haela ve pupu oharo kara iki kelavaki.

³ E va iapai — aireaki hoa mai heaha haela uku heheo maria avahaeakilai.

⁴ Areve okoare ape la ekeki hoa leahau? Ehovea papa haela apihaeape hoa ikiki ma hoa eharu hoveahovea hiki apealula.

⁵ Ereve ikikekela haeae, laelave ere haveva, kaia overa karikipe, kai meahaiapo ma ve overa karikipe, ehovea Aualari ve oharo hiki.

⁶ La oropa meahaiapo ma haa lei karia le leipe.

⁷ Aka ma hoa ve, Kaia i meahaiapo ila apeakilai, ehovea la oharo. Ere v'apeapea mai haeae haela heheavaki a v'ila hai ka leiki la hoa.

⁸ Apavara, ma oharo haveva kalaivahaelue. Amua ve hare haroapo va hitolo 1,000 hoveahovea, kai hitolo 1,000 are ka hare haroapo hovea.

⁹ Amua ve okoare hahari hahari lei va ka, Uku haela ve hahari hahari hovea. Aka are elaviilara ikihuru leilula. Are ikivere ka areve haela heaha leivahaeakive. Are va ikivere haela oaria haeae ve ikihuru lei helarivahaeakive.

¹⁰ Aka Amua ve hare, oroa korea leivila la haela hovea, ekekilai. La hare kaia karia leikilai, iki hahika eapapo ila; meahaiapo ahea eapapo lei avoakilai; meahaiapo eharu oaria a haeakilai.

Kiva auhohi leivahaeakive, heroe

¹¹ Ehovea ma eharu oaria karia leivahaeakilai. E va hehe mai ehoe iele kiva leivahaeakive, heroe; Aualari ve pupu kiva auhohi leivahaeaki.

¹² Aualari ve ekeki hare kariki — La hoa kaia i meahaiapo ila a v'ila karia leivahaeakilai; eharu oaria kara ahea lei avoakilai.

¹³ Aka, ehovea areve okoare, elaviila kaia i meahaiapo ila āre la kariro, la va mai ehoe iele hoa.

¹⁴ Laelave, apavara, ehovea e va la eharu la kariro, kiva auhohi leivahaeaki, areve ekeki hoa are ero havila ila, veveroro i veveke ila eavakilai.

¹⁵ Iki kelavaki, are va haiapo leivila iele, ehovea elaviilara ovokake leivahaeakilai. Hoveahovea elaviilave apoheari, Paul, are avape la ikiore v'ila ero oharo paraeape.

¹⁶ Areve hohoa oaria laria; are va ma oharo kileavahaeape. O iele, uku ma oharo aheke i heraho ila. Ikihorahora la haela ere va ma oharo aheke v'ila heraho lei heaha leivahaelula — hoveahovea, Buka oharo uku kara laria.

¹⁷ Apavara, ehovea e ma eharu ore overa leivahaeape, kiva leivahaeaki, mai heaha haela ero kari auki ave, e kai hihilauki ave.

¹⁸ Ikiheroe meru i aheke leivahaeaki. Elaviilave Amua Iesu Keriso, lei ovokake haela, iki auhohi kelavaki. Areve rare lei morapaeaki aiai karia lei va ka.