2 Peter 2 - Pupu Oharo Āre 1963 Genese 1970 Rute 1972

Opore peroveta haela i okiharo heaha ila

¹ Aka opore peroveta haela apearoape. Hoveahovea eve leia opore kilea haela apearo; ere va opore mai oaria kileavahaelula. O iele, uku haela ere havahu ilaea leipe la Amua kara hihila epalula. Laria ere elare heaha eapapo leivahaeakilai.

² Uku haela kara ere havahu ve oki haeae auvahaelula, ereve la oki v'ila o iele la okiharo kara haela o haeae avahaeakilai.

³ Ereve mai haeae v'ila ere va ero au amuraeakilai — ereve heheavaki hoa ekekilai — erero elavelave hahakilai.

⁴ Aualari haeae leipe la aneru heheavape. Are arero Hell ve ipi iele la koape. Are erero muru iele la ita auri horou hahape aiai aireaki la heheavaki hoa.

⁵ Are overa hoa meahaiapo hai ka leipe. Noah i haela seven ila hiki ovokake leivahaeape, ehovea are va iroro arive haela mekakure. Ma haa eapapo Aualari iapaki aue haela oaria lei ihahape la hoa.

⁶ Are Sodom i Gomorrah ila la karikara hoa haroapo a vea hai ka leivahaeape: are erero aireaki Aualari hahaure leivahaeaki haela oaria ve ihova leivahaeape.

⁷ Are Lot lei ovokake leipe, ehovea Lot la karikara haela oaria ve mai heaha ikihairihairi leipe.

⁸ Ehovea are va mai ehoe haela, aka are va ereve la karikara aeaveape hoa, hare oaria are ereve mai heaha v'ila heraho eapapo leipe.

⁹ Amua areve mai ehoe haela amuraeharae hoa lei ovokake leikilai. Are va mai haeae haela hahai aiai aireaki la heheavaki hoa.

¹⁰ Lahovea haela aivau ve mai hahaeae oaria leilula. Ere ehoe heheavaki mai hahaure leilula; Ere va iapaki aue i pelaea leilula haela; ere va Amua ve rare heheo arive oaoka ka.

¹¹ O iele, aneru va ereve oropa haela, aka ere va erero Amua ve oropa ve oharo haeae e va ka.

¹² Aka ma haela, ehovea ere va loaloalula eharu hoveahovea, erero hai ka leivahaeakive, heroe, ehovea ere haveva la eharu v'ila ere o heaha arula. Ere elare heaha v'ila apihaeakilai.

¹³ Ere mai haeae ve kavale aeakilai. Hoveahovea hare hoa ere va mai heaha naoae naoae leilula. Ere va haela heaha iele, ehovea ere va e i hoa haroapo eapai laralula haela, hehepo iele.

¹⁴ Ere va airi pavora mai ikivere, kai mai haeae hakurepa va ka. Ere va mahuka haela amuraealula; ereve iki ureve haeae iele.

¹⁵ Ere va okiharo ehoe hakurepape: ere va oki haeae auvahaeape. Ere va Balaam, Bosor ve akore, ve okiharo hovea auvahaeape. La haela mai haeae ve kavale ikivere leipe.

¹⁶ Aka Amua arero haeae ve erereape; oharo haveva la ass areve ikihaveva mai v'ila erereape.

¹⁷ Ere va ma karia ma karu hovea — mea heaha koalula la meuru hovea: ereve aireaki hoa muru havahu iele.

¹⁸ Ere va oharo pelaea oaria arula la hoa ere va mai heaha āre hakurepaki la haela aivau ve mai heaha ve okiharo ve amuraealula.

¹⁹ Ere erero ovokake oharo kilealula, aka ere va mai heaha ve horova haela hovea: ehovea haela ae haela ae la hahakilava, la haela va areve horova haela iele.

²⁰ Ere va oropa meahaiapo ve mai heaha la hakurepakilava, Ovokake Iesu Keriso ve okiharo ve, kai aireaki la mai heaha erero la heaora?-?pakilava, o iele, ereve la oropa hoa perehekai heaha, aka aireaki hoa ere va heaha iele.

²¹ Heaha perehekai ma: ere va okiharo veveke ore lei v'arekaea; aka heaha eapapo la okiharo oropa ore leikilai, aireaki kai la pupu veveke haure leikilai.

²² Overa hape oharo ere v'ila iele leipe maria, Mu kaitavape la ave helari areve la mu aeka le lape. Mi mitape la ila abu, aeka elare pikuru le hoaupe.