2 Peter 1 - Pupu Oharo Āre 1963 Genese 1970 Rute 1972

Ikiheroe oharo

¹ Ara, Simon Peter, Iesu Keriso ve horova haela i aposetolo haela, ara i hareho iki kelavalula haela oaria ve hohoa mave haeaive. Elaviilave ikikekela aheke leipe iele ehovea elaviilave Aualari i Iesu Keriso, lei ovokake haela, ila ve mai ehoe ve harihari.

² E ikiheroe meru i havila eapapo ila apeaki, ehovea e va Aualari i Iesu Keriso, elaviilave Amua ila ore overa leivahaeape.

Keriso ve haela ve avaki mekakure

³ Areve Ove ve aheke elaviilara aikiarape ovokake i Aualari ve eharu mekaka oaria. Are elaviilara itavavahaeape iele ehovea areve mai mekakure iele ore leikive.

⁴ Laelave are elaviilara okoare mekaka iele aikiarape; ma okoare v'ila areve Ove Veveke herehere avakilai, laelave e va meahaiapo ve mai haeae ve kavale koara va ka.

⁵ Ehovea ma, eve ikikekela aheke leivahaeaki — mai ehohoe kiva leivahaeaki, ikiore mai kara.

⁶ Ikiheroe mai kara kiva leivahaeaki; hihiri mai kalaivahaelue: Aualari ve ikivere hiki leivahaeaki.

⁷ Apavara, elarelare ikiheheroe leivahaeaki; ikihuru mai iele leivahaeaki,

⁸ Ehovea ma eharu e v'ila iele lapeakilava, e va iele havahu Aualari ve horova aheke iele leivahaeakilai. E kai haela mekaka leivahaeakilai.

⁹ Aka haela ae ma eharu aeaki aue la leikilava, are va ovohae kariri hovea, are mekari eava va ka: are kekela va ka areve la mai heaha oaria overa hapururukape.

¹⁰ Laelave, apavara, e va kiva auhohi leivahaeaki; ero itavavahaeape la iele ikikelavaki. E va maria la leivahaeakilava, e va heaha leivahaea va ka.

¹¹ Laria, e va elaviilave ovokake leiki Amua Iesu Keriso ve basileia araeakive oki veveke le koarakilai;

Peter ve apaki hoa maeamaea

¹² Laelave, are ero ma eharu oaria kileavahaeakive haveva lei va ka: aka e va erero ore overa leivahaeape, e va o iele iki overa kelavape.

¹³ Kaire, veveke maria, ara va meahaiapo aeaki hoa, ero ma eharu oaria kileavahaeakilai.

¹⁴ Ara v'ore, o iele elaviilave Amua Iesu Keriso araro iki ureve kileape, ara va meahaiapo hakurepaki hoa va maeamaea.

¹⁵ Ara va ikivere iele ma, ara la apakilava, e va aireaki kara ma eharu iki kelavakilai.

Peter i peroveta haela ila ve vavavaki oharo

¹⁶ Ehovea ela va Amua Iesu Keriso ve aheke i kihoreraki hoa ila ero kileavahaeape la hoa ela va lou‐oharo i opore oharo ila au hukavaila. Ela va areve haharika iele havahu eavavahaeape.

¹⁷ Ehovea Oa Aualari arero o iele morapaeape. Akea iele la āra mekakure ma oharo iele avahaeape, Ma va ara iki havahu akore, ara va arero ikivere iele leive.

¹⁸ Kaia ve kihoaupe la āra ela iapape — ela are i hareho kela pekape la hoa.

¹⁹ Laelave peroveta haela avahaeape la oharo kara o iele. Laelave e va la oharo auhohi iapavahaeakive: Are va muru hoa heauapaki ovava hovea, aiai mea opaki la hoa, hare ve la kou veveke eve iki ureve pekakilai.

²⁰ Ma oharo iapaila: Haela ae peroveta oharo lahua helarikive hoveahovea ka.

²¹ Peroveta oharo au ekeila ehovea haela ve ikivere, aka hehe haela Ove Veveke erero kileavahaeape la oharo hiki avahaeape.