2 John 1 - Pupu Oharo Āre 1963 Genese 1970 Rute 1972

¹ Ara, Aualari ve oropa haela, uamari mekakure i areve akoremari ila ve hohoa mave paraeaive. Ara ero o iele v'ila ikiheheroe leivila. Ara hiki ka, aka o iele ore leivahaeape la haela oaria kara.

² Ehovea elaviila ureve aeavila la O iele ve harihari. La O iele ela i hareho aeavila aiai karia lei va ka.

³ E va Oa Aualari i Amua Iesu Keriso, Oa ve Akore ila, ve ikiheroe meru i ikihuru i havila ila apeaki, O iele i ikiheroe iele ve okiharo ve.

⁴ Ara va ikiveveke eapapo leipe ehovea ara eve akoremari uku mai veveke kiva leilula eavape, Oa eapapo avikiarape la pupu hovea.

⁵ Mahau, ara aro apevelavela leive, uamari e, pupu oharo āre va ka, aka elaviila overa iapape la pupu hovea, elaviila elarelare ikiheheroe leivahaeakive.

⁶ Ikiheroe mai iele ma: Elaviila areve pupu hovea kiva leivahaeaki: pupu iele ma: e va oropa hoa ore leipe la ikiheroe mai, hare oaria kiva leivahaeaki.

⁷ Ehovea opore haela oaria meahaiapo apearo — ere va Iesu Keriso aivau ve ekepe la oharo iapa va ka. Lahovea haela va opore i Keriso ve iri haela ila.

⁸ E va elare mai kiva auhohi leivahaeaki — elaviila overa horova leivahaeape la eharu havoava v'arekaea, elaviila mai veveke ve kavale avakive heroe.

⁹ Haeae leivahaeaki la haela, kai Keriso ve kileaki oharo haure leiki la haela, are Aualari ve haela va ka, Keriso ve kileaki oharo iele iapaivila la haela, are va Oa i Akore ila hareho aeavila.

¹⁰ Ma haeae kekelaki haela eve leia la pekakilava, are eve uvi kapekalue, arero auhohi lei v'arekaea.

¹¹ Ehovea arero auhohi leiki la haela areve haeae hoa haroapo herehere leikilai.

¹² Ara va ikivere oharo oaria ero paraeakive, aka ara hohoa oaria haea va ka. Ara va ikivere iele eve leia pekakive. Ara e i hareho oharo hukavakive; elaviila la hoa ikiveveke eapapo leivahaeakilai.

¹³ Ave mariloa ve akoremari aro ikiheroe oharo paraeairo.