2 Corinth 9 - Pupu Oharo Āre 1963 Genese 1970 Rute 1972

¹ O iele, ara ma hehe haela ve meru leikive oharo ero leve paraeakive?

² Ehovea ara v'ore eve ikivere mai. Ara e v'ila Macedonia haela morapaeaki oharo overa maeaeape. Ara mariape — Achaia ma horova overa hitolo ikivere leipe, kai haela oaria e v'ila la oharo iapai ikivere le leivahaeape.

³ Aka ara apavara uku paparaehape, ehovea ara ikivere ka ero naoae momorapukive — e va hoveahovea hela leivahaeakive;

⁴ Macedonia haela araro koarai auvahaeaki la hoa, e va hoveahovea leivahaeaki aue la leikilava, (ela hiki ka) ela kara ma oharo v'ila makiri leivahaeaki ave.

⁵ Laelave ara apavara oropa auvahaeakive maeaeape, ehovea e va okoare maeaeape la meru overa korukaiavahaeakive: laria la leikilava, eve meru ikiheroe iele le leikilai, ape karava va ka.

Meru avaraki mai

⁶ Ara maria maeaive — hae perehekai puravaivelariki la haela, iele kara perehekai hovare hoa haerapakilai. Hae oaria puravaivelariki la haela, hovare hoa iele oaria koarakilai.

⁷ Haela oaria elave ikikekela hovea avaraki: ikihairihairi mai aikararue, aeva ehovea ape karava hiki ka, Aualari ikiveveke aiaravila la haela ikivere eapapo leivila.

⁸ Aualari ikiheroe meru oaria ero hare oaria aiaravila. Laelave, ehovea e va eharu oaria ila, e meru oaria hare oaria aiarakive ore, ehovea horova veveke hukapakive.

⁹ Overa hape hohoa maria, Are va eharu oaria merava haela oaria aiaravila: areve ikiheroe aiai karia lei va ka.

¹⁰ Au apoporauki la hae oaria aiaraki la Aualari are va eve eapai eapapo aiarakilai, kai apoporauki la hae oaria kara, iele maeokoko leivahaeakilai: eve mai ehoe ve, iele kara oaria le horeavakilai.

¹¹ E va mea oaria erohoho leivahaeakilai, laelave, eve meru kara oaria aiarakilai. Ehoveala, ela kara Aualari v'ila ikiveveke eapapo leivahaeakilai.

¹² Ehovea meru maria la leikilava, hehe haela veveke koarakilai, aeva Aualari kara le morapaeakilai.

¹³ E va ma horova la leivahaeakilava, haela oaria Aualari morapaeakilai, ehovea e va areve horova iele koarailula, Keriso ve iroro ve okiharo ve, aeka, ehovea e va la haela kara ikiheroe eapapo leivahaelula.

¹⁴ Ere va ero ikivere. Ere e v'ila ivaiva leivahaeakilai, ehovea Aualari ve ikiheroe e v'ila hihika leipe.

¹⁵ Aualari ve rare lei morapaeaki, ehovea areve meru mekakure iele.