2 Corinth 8 - Pupu Oharo Āre 1963 Genese 1970 Rute 1972

Jerusalem merava haela ve meru korukaiaki

¹ Oharo aeka ma — apavara: Ela va ikivere Aualari Macedonia la ekalesia ikiheroe meru avarape la oharo oaria ero kileavahaeakive.

² Ereve heraho eapapo leivahaeape hoa, ere va eharu perehekai iele la hoa, ere va ikiveveke ila meru oaria aiarape.

³ Ehovea ereve maea hovea, ara o iele maeaive, aeva kepea ila, ere meru aiarape.

⁴ Ere elaro here leivahaeape ela ereve la meru avakive, ehovea hehe haela ve kiva leikive horova koarakive.

⁵ Ere va maria leivahaeape, elave ikivere hovea hiki au leila, aka ere havahu ve iki oropa Amua ve haela hovea leivahaeape, aireaki elave haela hovea le leivahaeape, ehovea Aualari ve iki hovea hovea.

⁶ Laelave, ela Titus kara maria maeape, are va ipopeavape la horova are e v'ila kara hoveahovea leikive.

⁷ Laelave, ehovea e va eharu oaria v'ila aheke apealula: ikikekela, kai Oharo, kai ikiore, kai horova eapapo, kai ikiheroe mai kara, e kai ikiheroe meru kara paraeakive, heroe.

Iesu ve ihova

⁸ Ara pupu hovea maea va ka, aka ehovea haela aea ma horova veveke leipe, aeka ela va ikivere eve ikiheroe iele ore leikive.

⁹ Ehovea e v'ore elaviilave Amua Iesu Keriso ve ikiheroe meru eapapo leipe: Are elaviilav'ila erohoho haure lei merava leipe, la mai v'ila e va erohoho iele leivahaeakilai.

¹⁰ Ara ero maria kirive — ehovea e maria veveke le koarakilai, ehovea e va ma horova overa ipopeavape, hitolo haroapo karia le leipe.

¹¹ Laelave, ma hoa horova iele leivahaeaki, ehovea e oropa ikivere leivahaeape, ma hoa iele leikive heroe, eve maea hovea leikive.

¹² Ehovea haela oropa ikivere la leikilava, areve meru areve maea hovea hiki ela avakive, kai areva karia la eharu kekela va ka.

¹³ Ara ikivere ka maria, haela ae heraho kari leiki la hoa, e hiki heraho leivahaeakive.

¹⁴ Aka haela oaria hovea hovea leikive, heroe. Eharu karia la haela eve erohoho hukapakilai, e va karia la hoa, ereve erohoho ero kai hukapakilai.

¹⁵ Overa hape hohoa maria Eharu oaria korukaiape la haela, areve kepea karia — eharu perehekai iele la haela kara merava au leila.

Titus i haela uku ila ve horova

¹⁶ Aka Aualari morapaeaki — ehovea are Titus ve iki ureve ero kiva leikive maeape.

¹⁷ Arero maeape la oharo are iapape. O iele, are havahu ikivere lei eve leia aupe.

¹⁸ Ela are i hareho paraeape apoheari aea, la apoheari ve horova veveke ekalesia haela oaria momorapulula.

¹⁹ Ae va ekalesia haela oaria arero hareavape — ehovea elave hahi hoa elaro koarakive: ehovea elave ma ikiheroe meru Amua ve rare morapaeaki meru ma. Are ela i hareho kiva leikilai, kai hamureakilai, eve ikikekela kara hovea hovea.

²⁰ Ehovea ela ikivere ka haela elave ma meru hamureaki horova haeae oharo hukavakive.

²¹ Ela va ikivere mai ehoe havahu leikive, Aualari oropa ve hiki ka, aka haela oaria ve oropa ve kara.

²² Laelave, elave ma apavara āre ere i hareho paraeaive, ela va areve horova veveke hoa oaria ore overa leivahaeape, kai ma hoa kara.

²³ E ve haela ae Titus v'ila apevelavela la leikilava, are arave kake i horova koaraki haela e ve leia vea. E va elave apavara v'ila velavela la leikilava, ere kai ekalesia paparaehape la haela, kai Keriso ve rare momorapulula haela.

²⁴ Laelave, ekalesia ve oropa ve, eve ikiheroe hihika havahu leivahaeaki, kai ela va e v'ila pelaea leipe la oharo o iele leikive, heroe.