2 Corinth 7 - Pupu Oharo Āre 1963 Genese 1970 Rute 1972

¹ Elaviila ma okoare aeape, arave akoremari iele e, laelave elaviila ve aivau i ove ila ve hirihiri huhelavaea va heroe, Aualari ve oropa ve elaviilave hehe maea lari arilai.

Ikihorahora i Ikiveveke ila ehovea Titus avikepe oharo

² Elaro hela auhohi leivahaeaki: Ela va haela ae haeae au leila; ela va haela ae mai heaha au kileaila, ela haela ae ve eharu korea au leila.

³ Ara ma oharo he va ka ehovea ero hahai heheavakive — ehovea ara ero overa maeaeape, e va elave iki ureve ela i hareho api kai ovokake leivahaeakilai.

⁴ Ela va e v'ila ape karave maeaevila, ela e v'ila pelaea leilula, ela e v'ila heraho leiki hoa oaria kara iki veveke leilula.

⁵ Ehovea ela Macedonia elaupe la hoa elava maea kakare oaria, kai iki au paparaehaila; ela va heraho eapapo leivahaeape, mahokaea ve hahari oaria, iki ureve kara paiala paiala hiki.

⁶ Aka hihi?-?lalula haela ve hakakaeaki Aualari elaro lei mekaka leivahaeape, ehovea are Titus elaro kai kiparaeape.

⁷ Ehovea are va ekepe, leia hiki ka, aka ehovea are e v'ila ikiveveke leipe. Eve ikivere havahu mai, eve ikihuru, e va araro ikivere leipe la mai, are elaro kileavahaeape, laelave ela kara ikiveveke eapapo leivahaeape.

⁸ Ehovea ara ero paraeape la hohoa e va ikikakare eapapo leivahaeape, laelave ara ikihairihairi ka, aka ara oropa hoa ikihairihairi leipe. Mahau ara ore e va ikikakare leivahaeape, ehovea arave la hohoa; aka e va iki kakare haiapo au leila.

⁹ Ma hoa ara va eve ikikakare v'ila lei ikiveveke iele, ehovea e va ikikakare havahu ka, aka ehovea e va ikikakare lei kai iki kelavi iki le helarivahaeape. Ehovea eve ikikakare leivahaeape la okiharo Aualari v'ila leipe, laelave e va elave okiharo ve heaha au koaraila.

¹⁰ Ehovea Aualari ve la ikikakare ve okiharo haela aireaki ikiveveke koarakilai; aka meahaiapo la ikikakare okiharo haela aiai le apakilai.

¹¹ E va eavaila — e va Aualari ve la iki kakare koarape, laelave eve iki lei ehohoe leivahaeape: e va mai veveroro ikivere leivahaeape: e va ara v'ila hihiri leivahaeape, e va ikivere eapapo arave rare lei veveke leikive. Laelave e va eharu oaria v'ila lei ehohoe leivahaeape.

¹² Laelave, ara eve hohoa hai paraeape ehovea haeae leipe la haela va ka, aeka ehovea haeae koarape la haela va ka, aka ehovea e ore leivahaeakilai, ela Aualari ve oropa ve ero kiva mea oaria leivahaelula.

¹³ Laelave ero hakakaeape la hoa ela kara hakakaeaki mai koarape. Aeva ela va ikiveveke eapapo leivahaeape ehovea Titus kara e v'ila ikiveveke leipe, ehovea e oaria areve iki lei veveke leipe.

¹⁴ Ara va eve oropa ve pelaea araikilava, ara makiri lei va ka. Ehovea, hoveahovea, ela va o iele hiki ero kileavahaeape, ela va Titus oropa maeape la pelaea oharo o iele le leipe.

¹⁵ Are va iki ureve ero ikihuru eapapo iele leivahaevila, ehovea are eve iapa mai veveke iki kekelavila, ehovea e iki here ila arero eavi kiva leipe.

¹⁶ Laelave, ara va ikiveveke ehovea ara eharu oaria v'ila ero iki kekelavila.