2 Corinth 6 - Pupu Oharo Āre 1963 Genese 1970 Rute 1972

¹ Ela are i hareho horova leilula haela, ero here leiro, E Aualari ve ikiheroe meru naoae va kaealue.

² (Ehovea areve oharo maria: Ara va ikivere leipe hoa ara eve oharo iapape Ovokake leipe la hare ero kai hukapape. O iele areve ikivere hoa iele ma — ovokake hare iele ma.)

³ Ela va haela au huhilavaea va ka, elave horova ve rare heaha leiki ave.

⁴ Aka ela va Aualari ve horova haela hovea lei ehohoe leilula; heraho hoa ela ikihairihairi leivahaea va ka; horova hoa, aka ikihuru hoa kara;

⁵ Elaro haru koavalula la hoa, uvi muru apeaki hoa, hahari hoa, horova eapapo hoa, kiva leiki horova hoa, eroa hoa kara;

⁶ Iki veveroro i iki ore, iki aheke i ikiheroe ila, Ove veveke i ikihuru ila, ela va kiva hiki leilula.

⁷ O iele ve kai Aualari ve aheke ve, mai ehoe ve aheke v'ila, mai ore ukai i mai keva ukai ila.

⁸ Rare veveke aka rare heaha v'ila, hari veveke i hari heaha ila, au amuraeaki haela hovea, aka o iele haela kara.

⁹ Haela haveva haela hovea aka haela ore haela hovea, apihaeaki haela aka ovokake leilula hovea: haru koavape haela hovea, aka huru havahu ka.

¹⁰ Ela va ikihuru, aka mea oaria ikiveveke; ela ka merava haela aka erohoho haela hovea leilula; eharu karia, aka eharu oaria aealula haela hovea.

Ikikekela haela ikiheroe mai leivahaeaki

¹¹ Corinth haela e, ela e v'ila ape hihika hapai ape, ela e v'ila ikihuru leivahaeape.

¹² Elave iki ve ela ero hahaure leivahaea va ka; e havahu ve iki hapa va ka.

¹³ Laelave, e kavale veveke laila (ara ero arave akoremari hovea aihukamaeaive) e elare iki iele hela hapakive.

Ikikekelaki aue haela i hareho vea v'arekaea

¹⁴ E va ikikelavaki aue haela i hareho kopererea v'arekaea. Mai ehoe i mai heaha ila hareho loaloakive veveke lahoa ha?

¹⁵ Keriso i diabolo ila hareho loa vea va ka. Ikikekela haela i ikikekelaki aue haela koarai auva ka.

¹⁶ Aualari ve hehe uvi i opore harihu hareho apea v'arekaea. E havahu va ovokake Aualari ve Hehe Uvi. Aualari maria maeape, Ara ereve ureve aeakilai, ara ere i hareho veakilai, Ara ereve Aualari leikilai, Ere arave haela leivahaeakilai.

¹⁷ Laelave, e va erero haitapai kihoahukakive E kai lahua leivahaeaki — Amua ve oharo la, Eharu hirihiri mai kapaealue: Ara ero eavakilai.

¹⁸ Akea iele la Amua kai mari maeaeape, Ara eve Oa iele leikilai. E kara arave akoremari leivahaeakilai.