2 Corinth 5 - Pupu Oharo Āre 1963 Genese 1970 Rute 1972

¹ Ehovea ela v'ore, elave ma maea ve uvi la kopararapakilava, ela va Aualari ve uvi le aeave. La uvi haela mai ve au kuila, are va kaia ve leia aiai karia lei va ka.

² Ehovea ela va mea oaria hivavara avahaelula, ehovea ela va ikivere Kaia ve la uvi elaro ma hoa haritopakive.

³ Elave maea la pura la hahaeakilava, ela va maheare apea va ka.

⁴ Ehovea ela va ma kovo ita ve uvi ve apealula haela hivavara hiki avahaelula, ehovea ela va heraho iele: O iele, ela va maea ka apeakive ikivere va ka, aka iele ila, ehovea maea ve eharu ovokake iele heheloe la koakilai.

⁵ Aualari elaro iele karikipe ehovea ma: are kai elaro Ove ve ihova avikiarape.

⁶ Laelave, ela va ikihorahora karia, ehovea ela va ore ela va maea ureve apeaki la hoa, ela va Amua apehai rare arula.

⁷ Ehovea ela va eava va ka, ela va iki hiki kelavalula.

⁸ Ela va ikihorahora ka, laelave ela va maea iilu hakurepakive ikivere, ehovea Amua ve leia pekahavi apeakive.

⁹ Laelave, ela va horova leilula. Ela la apeakilava, aka hakurepakilava, ela va areve oropa ve mekaka leivahaeakilai.

¹⁰ Ehovea elaviila oaria Keriso ve heheavaki haha oropa ve epavakilai. Leia haela oaria elare maea ve leivahaeape la horova oaria, veveke i heaha ila, hihika leivahaeai kavale hovea hovea aeakilai.

Keriso ve Ikiheroe elaviilave aheke i o iele ila

¹¹ Ela va Amua ve oaoka leiki okiharo ore, laelave ela va ikivere haela oaria karakive. Aka Aualari oropa ve elave mai ehoe hihika leivila. Eve ikikekela kara elaro lei ehohoe leikive, heroe.

¹² Ehovea ela eve oropa elare rare la morapaea va ka, aka e va ela v'ila ikiveveke leikive, heroe. Laelave e va maea pelaea hiki leilula haela heaorapakive.

¹³ Ela va ihape la leikilava, ela va Aualari ve leivahaeape. Ela va ikiore la leikilava, ela va e v'ila leivahaeape.

¹⁴ Ehovea Keriso ve ikiheroe elaro hahaevila. Elave ikikekela aheke maria, haela haroapo haela oaria v'ila apape, laelave haela oaria apihaeape.

¹⁵ Are haela oaria v'ila apape, laelave haela oaria lahua apea v'arekaea, aka ere va oaria v'ila api kai uroupe la haela i hareho apeakive.

Ovokake are Keriso ureve

¹⁶ Laelave ela haela oaria haela ve maea hovea hiki kelava va ka, O iele, ela va oropa hoa Keriso haela ve maea hovea ore leipe, aka ma hoa ela arero haela ve maea hovea kelava va ka.

¹⁷ Laelave, haela Keriso i hareho la aeakilava, are va haela āre leive. Overa eharu karia le leipe: Iapaila, eharu oaria eharu āre hovea leiro.

¹⁸ Eharu oaria Aualari ve. Are elaro Keriso v'ila areve haela havahu leivahaeape; areve ikiheroe horova leivahaeakive itavavahaeape.

¹⁹ Ehovea Aualari Keriso v'ila meahaiapo are v'ila lei veveke leikive ekepe. Are kai ereve heaha ve oki ve mehau au avaraila. Are elaro kara ma ikiheroe oharo aikiarape.

Keriso elaviilara lei ehohoe leivahaeape

²⁰ Laelave, ela va Keriso ve paparaehape haela, hoveahovea, Aualari elave oki ve ero velavela leivahaeape. Ela va ero Keriso ve rare v'ila apevelavela leivahaeairo — E Aualari i hareho apeakive.

²¹ Ehovea Are arero mai heaha haela hovea leipe, ehovea elaviilara koarakive; aka are mai heaha au leila. Ehovea areve oki ve elaviila Aualari ve mai ehoe ore leikilai.