2 Corinth 4 - Pupu Oharo Āre 1963 Genese 1970 Rute 1972

Keriso ve iroro horova mekakure

¹ Laelave, ela ma horova leivila hoa, ehovea Aualari elaro ikiheroe leivahaeape, ela va mahuka leivahaea va ka.

² Ela va makiri leivahaeaki la muruhari eharu haitapape. Ela va mai heaha ve la oki auvahaea va ka, kai Aualari ve oharo opore kai hukava va ka. Ela va o iele hihika kilealula, laelave haela oaria Aualari oropa ve, elaro rare veveke rare arula.

³ Aka, ela va iroro oharo la avilarapakilava, au titavape la haela kara arero eava va ka.

⁴ Ma meahaiapo harihu ikikelavaki aue haela ve iki le kokaukape, Aualari ve maea hovea la Keriso ve iroro oharo ereve iki va heaoapaki ave.

⁵ Ehovea ela elare oharo kilea va ka; ela va Amua Iesu Keriso ve iroro oharo arula. Ela va eve horova haela, ehovea Iesu ve harihari.

⁶ Ehovea, Ovava mea muru ve kihorerakive maeape la Aualari, elave iki ureve kai heaoapape, ehovea Aualari ve haharika ve ikiore ve Ovava Iesu Keriso ve oropape v'ila avarakive.

Aposetolo haela va mahuka, Aualari va aheke

⁷ Aka ma eharu mekakure ela va meahaiapo ve eharu ureve hailavalula, laelave aheke ve mekakure va Aualari v'ila leikive, elav'ila va ka.

⁸ Ela va mea oaria heraho leilula, aka ikihairihairi leivahaea va ka. Ela va ikihorahora leilula, aka oaoka leivahaea va ka.

⁹ Haela elaro hararualula, aka Aualari elaro haitapa va ka. Haela elaro haru koavalula, aka ere elaro hai ka leivahaea va ka.

¹⁰ Elave maea ve Iesu ve apape ihova ela mea oaria kiva leilula, laelave Iesu ve ovokake kara elave maea ve hihika leikilai.

¹¹ Ehovea ela va ovokake haela, aka mea oaria ela va Iesu ve harihari ve apihaealula, laelave Iesu ve la ovokake elave aivau hihika amoeavila.

¹² Laelave apaki maea elave ureve horova leivila, aka ovokake eve maea ve leivila.

¹³ Elave ikikekela ve Ove le aeave — La ove v'ila oharo maria hape: Ara va ikikekelape, laelave ara oharo ape. Ela kara ikikelavalula, laelave ela oharo hihika arula.

¹⁴ Ela v'ore Iesu lai urapape la Aualari, Iesu ve oki v'ila, elaro kara lai uralapakilai. E ela i hareho areve oropa ve epavakilai.

¹⁵ Ehovea eharu oaria e v'ila leilula, ehovea haela oaria ve morapaeaki oharo ve ikiheroe meru v'ila, Aualari ve rare iele momorapukive.

Meahaiapo heraho haiapo ka, Ovokake Iele haiapo

¹⁶ Laelave, ela mahuka leivahaea va ka. Elave maea iilu la apakilava, iki ureve hare oaria aheke leivila.

¹⁷ Ela va aireaki ovokake hoa ikiveveke eapapo koarakilai, ehovea ma hoa ve kakare i heraho leiki hoa.

¹⁸ Ehovea ela va hihika la eharu ovohae eavavahaea va ka. Ela haela eavavahaeaki aue la eharu iki kelavalula. Ehovea haela eavavahaelula la eharu va hai ka leivahaeaki eharu, aka eavavahaeaki aue la eharu, ere va haiapo aiai karia lei va ka.