2 Corinth 2 - Pupu Oharo Āre 1963 Genese 1970 Rute 1972

Mai heaha ve ikihuru lei helariki haela aeka mai paeakive

¹ Ara ikikekelape maria: Ara va ikihairihairi ila eve leia elau va ka.

² E va arave ukai ikihairihairi la leivahaeakilava, araro ikiveveke leita leikilai ha? O iele, arave ukai ve ikikakare leivila la haela.

³ Ara ma oharo ero overa paraeape; ara eve leia elauki hoa ara va eve oki ve ikikakare leiki ave, ehovea e va arave la ikikakare au hakakaea va heroe: ehovea arave ikikekela ara va ikiveveke leikilai, e kara ikiveveke leivahaeakilai.

⁴ Ehovea ara ikihairihairi i o ma ila ero oharo paraeape. Ara ikivere ka ara ero ikikakare leikive, aka ehovea e ore leivahaeakilai, ara ero ikiheheroe eapapo leivahaeavila.

⁵ Haela ae haela ae la lei ikikakare la leikilava, ara hiki ikikakare au leila, aka haela oaria ikikakare leivahaeape; ara opore oharo e v'arekaea.

⁶ Lahovea haela kavale maria avakive heroe, haela oaria leivahaeape la kakare.

⁷ Laelave, e va oki ae kekela hukavi, areve heaha hapururuka va heroe, kai arero hakakaeakive heroe, are va ikihairihairi eapapo lei heaha leiki ave.

⁸ Laelave ara va ikivere e erero leilula la ikiheroe mai aeka hihika amoeakive.

⁹ Ara va hohoa haeape iele ma, eve mai iele ore leikive, kai eve iapaki mai veveke ore leikive.

¹⁰ E va areve heaha hapururukaki la haela, are kara hapururukakilai. Ehovea ara haela ve heaha la hapurukavakilava, ara Iesu Keriso ve harihari ve hapurukavape.

¹¹ Satan elaro heaorapaki ave; ela va areve horova heaha oaria haveva ka.

Iroro ve heraho i ikiveveke leiki eharu

¹² Aeka, ara va Troas leia elaupe ehovea Keriso ve iroro oharo arive la hoa, Amua arave okiharo veveke le hapape.

¹³ La hoa ara kai iki au paraeaila, ehovea ara va apoheari Titus au eavaila. Laelave are erero haitapai Macedonia elaupe.

¹⁴ Aka ara Aualari thank you eapapo avila, ehovea are araro Keriso ve rare ve la horova veveke leikive hukapape. Are kara elare rare v'ila ita lahua lahua haela oaria areve ikiore mekakure ore leivahaelula.

¹⁵ Ehovea ovokake leilula kai apihaelula la haela oaria ve oropa ve ela va Aualari i Keriso ila ve muo veveke hovea leilula.

¹⁶ Ehovea apihaeaki haela v'ila ela va apaki muo hovea; ehovea ovokake leilula la haela, ela va ovokake ve muo veveke hovea. Ae va ma horova ve hovea hovea leita leikilai ha?

¹⁷ Ela va Aualari ve oharo haiae kilealula la hovea hovea ka; aka o iele, Aualari oropa ve, ela va Keriso ve la o iele kileavahaelula.