2 Corinth 13 - Pupu Oharo Āre 1963 Genese 1970 Rute 1972

Kileaki oharo: Erero aireaki eavaki oharo

¹ Ma va hoa ilehoila ma ara eve leia aukive. Haela haroapo haroapo ve ape v'ila oharo lei ehoe leikilai.

² Ara ero overa maeaeape, ara eve leia aupe la hoa: ma hoa kara hoveahovea ara ero oropa maeaeaive: ara eve leia aire auki la hoa, ara mai heaha leivahaeape la haela, kai haela oaria kara, ara la heaha haveva lei va ka.

³ Ehovea e va ikivere ore leikive, ara va Keriso ve oharo hukavavila: Keriso e v'ila mahuka lei va ka, are va aheke iele.

⁴ Ehovea are va mahuka lei satauro ve le apape, aka are va Aualari ve aheke v'ila ovokake leivila. Ehovea ela kara areve ureve mahuka leilula, aka e ore leikilai, ela va are i hareho Aualari ve aheke v'ila ovokake leilula.

⁵ Elare iki heheavaki, eve ikikekela va iele ha? E elare iki ureve haveva ha? Iesu Keriso va eve iki ureve aeavila. Are eve ureve aeaki aue la leikilava, e va mai heaha haela hiki.

⁶ Aka, ara va ikivere e ore leikilai, ara haela heaha va ka.

⁷ Ara Aualari e v'ila ivaiva leive — e va haeae leivahaea va arekaea: Ela kekela va ka elave veveke, aka ela haeae la leikilava, e kai ehohoe leivahaeakilai.

⁸ Ehovea elave horova o iele hahari arive hovea ka, aka elave horova o iele leivila.

⁹ Ela va mahuka la leikilava, ela va ikiveveke, ehovea eve aheke.

¹⁰ Laelave, ara ma oharo haeaive, ara eve leia pekaki hoa, ara o aheke maeaki ave. Ara Amua avikiarape la aheke ve oki ero lei aheke leivahaeakive, ero heaha leivahaea va arekaea.

Kokaukaki oharo

¹¹ Arave hita oharo ma: E va apeaki: e va horova veveke leivahaeaki: ikiveveke ila apeaila: ikikekela ka haroapo. E havila ila apeaki. Ikiheroe i havila ila ve Aualari e i hareho aeakilai.

¹² E elarelare ikiheheroe leivahaeaila.

¹³ Hehe haela oaria ero ikiheheroe leivahaeairo.

¹⁴ Amua Iesu Keriso ve ikiheroe meru, Aualari ve ikihuru, Ove Veveke ve hakakaeaki mai e i hareho apeaki.